പി.ചിദംബരം എയർസെൽ - മാക്‌സിസ് കേസിൽ ഒന്നാം പ്രതി

ന്യൂഡൽഹി: മുൻ ധനമന്ത്രി പി.ചിദംബരം എയർസെൽ മാക്‌സിസ് കേസിൽ ഒന്നാം പ്രതി. എൻഫോഴ്‌സ്‌മെന്റ് ഡയറക്ടറേറ്റ് സമർപ്പിച്ച അനുബന്ധ കുറ്റപത്രത്തിലാണ് ചിദംബരത്തെ ഒന്നാം പ്രതിയാക്കിയത്. 3500 കോടിയുടെ കള്ളപ്പണം വെളുപ്പിച്ച കേസിലാണ് ചിദംബരം ഒന്നാം പ്രതിയാക്കപ്പെട്ടിരിക്കുന്നത്. ചിദംബരത്തിന്റെ വീട്ടിൽ നിന്ന് എൻഫോഴ്‌സ്‌മെന്റ് ഡയറക്ടറേറ്റ് റെയ്‌ഡ്‌ ചെയ്ത് രഹസ്യ രേഖകൾ കണ്ടെടുത്തിരുന്നു. എയർസെൽ മാക്‌സുമായി ബന്ധപ്പെട്ട സിബിഐയുടെ രഹസ്യ രേഖകളാണ് കഴിഞ്ഞ ജനുവരി 13ന് നടത്തിയ റെയ്‌ഡിൽ കണ്ടെത്തിയത്.

ചിദംബരത്തിന്റെ വീട്ടിൽ നിന്ന് കണ്ടെത്തിയ രേഖകൾ സുപ്രീം കോടതിയിൽ സമർപ്പിച്ചവയായിരുന്നു. അടുത്ത മാസം 26 ന് കേസ് പരിഗണിക്കും. ചിദംബരം മകൻ കാർത്തി ചിദംബരം അടക്കം ഒമ്പത് പേരാണ് കേസിൽ പ്രതി ചേർക്കപ്പെട്ടിട്ടുള്ളത്. മുംബൈ ആസ്ഥാനമായി പ്രവർത്തിക്കുന്ന എയർസെൽ മാക്സിന് 600 കോടിയുടെ വിദേശ നിക്ഷേപം സ്വീകരിക്കാൻ ധനമന്ത്രിയായിരിക്കെ ചിദംബരം ചട്ടങ്ങൾ മറികടന്ന് അനുമതി നൽകിയെന്നാണ് കേസ്. 2011 ലാണ് ടൂ ജി സ്‌പെക്ട്രവുമായി ബന്ധപ്പെട്ട് എയർസെൽ- മാക്സിസ് കേസ് തുടങ്ങിയത്.