ഭോപ്പാൽ: സഞ്ജയ് ലീല ബൻസാലി സംവിധാനം ചെയ്ത് ദീപിക പദുക്കോൺ നായികയാകുന്ന, വിവാദസിനിമ 'പദ്‍‍മാവതി'ക്ക് മധ്യപ്രദേശിൽ നിരോധനം ഏർപ്പെടുത്തി. തിങ്കളാഴ്ചയാണ് സിനിമയ്ക്ക് മധ്യപ്രദേശിൽ നിരോധനം ഏർപ്പെടുത്തിയത്.
രജ്‍‍പുത് റാണിയായിരുന്ന പദ്മിനിയുടെ ചരിത്രം സിനിമ വളച്ചൊടിച്ചെന്ന് ആരോപിച്ചാണ് പ്രതിഷേധക്കാർ രംഗത്തെത്തിയത്. ഈ സാഹചര്യത്തിലാണ് മധ്യപ്രദേശിൽ സിനിമയ്ക്ക് നിരോധനം ഏർപ്പെടുത്തിയിരിക്കുന്നത്.
രാജ്യമെമ്പാടും സിനിമയ്ക്ക് എതിരെ പ്രതിഷേധം ശക്തമായ സാഹചര്യത്തിലാണിത്. മധ്യപ്രദേശ് മുഖ്യമന്ത്രി ശിവ് രാജ് സിങ് ചൗഹാൻ മാധ്യമങ്ങളെ ഇക്കാര്യം അറിയിച്ചത്. ചിത്രം റിലീസ് ചെയ്യുന്നതിന് നിരോധനം ഏർപ്പെടുത്താൻ സർക്കാർ തീരുമാനിച്ചതായി മുഖ്യമന്ത്രി അറിയിച്ചു.
അതേസമയം, മറ്റ് ഉത്തരേന്ത്യൻ സംസ്ഥാനങ്ങളായ ഉത്തർ പ്രദേശും രാജസ്ഥാനും ചിത്രത്തിൽ മാറ്റം വരുത്തണമെന്ന് ആവശ്യപ്പെട്ടിട്ടുണ്ട്. രജ്‍‍പുത് സമുദായത്തിന് ബുദ്ധിമുട്ട് സൃഷ്ടിക്കുന്ന വിവാദമായ രംഗങ്ങൾ എഡിറ്റ് ചെയ്ത് നീക്കണമെന്നാണ് ആവശ്യപ്പെട്ടിരിക്കുന്നത്.