പദ്മാവതി വിവാദം: രാജസ്ഥാന്‍ സ്വദേശി തൂങ്ങി മരിച്ചു

ജയ്പൂര്‍:സഞ്ജയ് ലീല ബന്‍സാലി ചിത്രം പത്മാവതി റിലീസ് ചെയ്യുന്നതില്‍ പ്രതിഷേധിച്ച് രാജസ്ഥാന്‍ സ്വദേശിയായ യുവാവ് ആത്മഹത്യ ചെയ്തു. ജയ്പൂര്‍ നഗര്‍ഹാര്‍ കോട്ടയുടെ പുറംമതിലില്‍ ഇയാള്‍ തൂങ്ങി മരിക്കുകയായിരുന്നു. പത്മാവതി സിനിമയോടുള്ള പ്രതിഷേധമെന്ന നിലയിലാണ് താന്‍ തൂങ്ങി മരിക്കുന്നതെന്ന് കോട്ടയുടെ ഭിത്തിയില്‍ ഇയാള്‍ എഴുതിയിട്ടുണ്ട്.

പത്മാവതിയോടുള്ള വിയോജിപ്പ് രേഖപ്പെടുത്തിയ ആത്മഹത്യ കുറിപ്പും കണ്ടെത്തിയിട്ടുണ്ട്. പ്രതീകാത്മകമായുള്ള പ്രതിഷേധമില്ല, കോലം കത്തിക്കിലില്ല, പദ്മാവതിക്ക് വേണ്ടി ഞങ്ങള്‍ കൊല്ലും- എന്നാണ് മൃതദേഹത്തിന് സമീപത്തെ കല്ലിൽ എഴുതി വെച്ചിരിക്കുന്നത്.
ഇയാളുടെ മരണത്തില്‍ തങ്ങള്‍ക്ക് യാതൊരു തരത്തിലും ഉത്തരവാദിത്തമില്ലെന്ന് ചിത്രം റിലീസ് ചെയ്യുന്നതില്‍ പ്രതിഷേധവുമായി എത്തിയ രജ്പുത്ര കര്‍ണി സേന വ്യക്തമാക്കി.

കഴിഞ്ഞ ദിവസം ബ്രിട്ടീഷ് സെന്‍സര്‍ ബോര്‍ഡ് ചിത്രത്തിന് പ്രദര്‍ശനാനുമതി നല്‍കിയിരുന്നു. ഇന്ത്യന്‍ സെന്‍സര്‍ ബോര്‍ഡിന്റെ അനുമതി ലഭിച്ചാല്‍ മാത്രമേ ചിത്രം പ്രദര്‍ശിപ്പിക്കൂ എന്നാണ് നിര്‍മാതാക്കള്‍ വ്യക്തമാക്കിയത്.