പഠാൻകോട്ട് ആക്രമണം: പാക് അന്വേഷണ സംഘം ഇന്ത്യയിലെത്തും

ന്യൂഡൽഹി: പഠാൻകോട്ട് ഭീകരാക്രമണത്തെ കുറിച്ച് അന്വേഷിക്കുന്ന പാക് അന്വേഷണ സംഘം മാർച്ച് 27ന് ഇന്ത്യയിലെത്തും. അന്വേഷണത്തിന്‍റെ ഭാഗമായി ഇവർക്ക് പഠാൻകോട്ട് വ്യോമസേന താവളത്തിൽ പ്രവേശനം അനുവദിക്കുമെന്ന് സൂചനയുണ്ട്. അന്വേഷണ സംഘം രണ്ട് ടീമുകളായി തിരിഞ്ഞാണ് അന്വേഷണം നടത്തുക. ഒരു ടീം ഡൽഹിയിൽ വെച്ച് ദേശീയ അന്വേഷണ ഏജൻസി (എൻഐഎ) യുമായി ചർച്ച നടത്തും. രണ്ടാമത്തെ ടീം പഠാൻകോട്ടിലായിരിക്കും അന്വേഷണം നടത്തുക.

പാക് സംഘം വ്യോമസേന താവളം സന്ദർശിക്കുന്നതിനെ കുറിച്ച് ചോദിച്ചപ്പോൾ ഇക്കാര്യത്തെ കുറിച്ച് സർക്കാർ തക്കതായ സമയത്ത് തീരുമാനമെടുക്കുമെന്ന് എൻഐഎ ചീഫ് ശരദ് കുമാർ ടൈംസ് ഓഫ് ഇന്ത്യയോട് പറഞ്ഞു. പാക് സംഘത്തിന് വ്യോമസേന താവളത്തിന് പ്രവേശനം ലഭിച്ചാൽ എൻഐഎ അധികൃതരുടെ സാന്നിധ്യത്തിലായിരിക്കും അന്വേഷണം നടത്തുകയെന്ന് വൃത്തങ്ങൾ അറിയിച്ചു. അന്വേഷത്തിന്‍റെ വ്യക്തതയ്ക്കായി ഇതുവരെയുള്ള കണ്ടെത്തലുകളെ കുറച്ച് ഇരു രാജ്യങ്ങളിലേയും അന്വേഷണ സംഘങ്ങൾ ചർച്ച നടത്താനും സാധ്യതയുണ്ട്.

അതേസമയം പഠാൻകോട്ടിൽ ആക്രമണം നടത്തിയ നാല് ഭീകരരുടെ ചിത്രങ്ങൾ എൻഐഎ പുറത്ത് വിട്ടിരുന്നു. ഇവർ നാല് പേരും പിന്നീട് മരണപ്പെട്ടു.