പട്ടേല്‍ പ്രക്ഷോഭം: ഗുജറാത്തില്‍ മൊബൈൽ നെറ്റ് നിരോധിച്ചു

ഗുജറാത്ത്: അഹമ്മദാബാദ്, സൂറത്ത്, മെഹ്‌സാന, രാജ്‌കോട്ട് എന്നീ നഗരങ്ങളില്‍ മൊബൈല്‍ ഇന്‍റര്‍നെറ്റിന് വിലക്കേര്‍പ്പെടുത്തി. പട്ടേല്‍ വിഭാഗക്കാര്‍ ഞായറാഴ്ച്ച നടത്തിയ റാലി അക്രമാസക്തമായതിനെത്തുടര്‍ന്നാണിത്. പട്ടേല്‍ സംവരണ പ്രക്ഷോഭത്തിന് നേതൃത്വം നല്‍കിയ ഹാര്‍ദിക് പട്ടേലിനെ ജയില്‍ മോചിതനാക്കണം എന്നാവശ്യപ്പെട്ടാണ് റാലി നടത്തിയത്.

റാലി അക്രമാസക്തമായതിനെത്തുടര്‍ന്ന് പോലീസ് ബലം പ്രയോഗിച്ചു. പോലീസ് നടപടിയില്‍ പ്രതിഷേധിച്ച് പട്ടേല്‍ വിഭാഗക്കാരുടെ സംഘടനകളായ എസ്.പി.ജി, പി.എ.എ.എസ് എന്നിവ തിങ്കളാഴ്ച ഗുജറാത്തില്‍ ബന്ദിന് ആഹ്വാനം നല്‍കിയിരിക്കുകയാണ്.

സംസ്ഥാനത്തെ പ്രധാന നഗരങ്ങളില്‍ സുരക്ഷ ശക്തമാക്കിയിട്ടുണ്ട്. ബോഠാഡ് ജില്ലയില്‍ ബസ് സര്‍വീസ് താത്കാലികമായി നിര്‍ത്തിവച്ചു.