ന്യൂഡൽഹി: ഒക്ടോബറിൽ രാജ്യത്ത് യാത്രാ വാഹനങ്ങളുടെ വിൽപ്പനയിൽ നേരിയ വർധനവ്. 0.28 ശതമാനം വർധിച്ച് 2,84,233 ൽ നിന്ന് 2,85,027 യൂണിറ്റിലാണ് എത്തിയത്. ആഭ്യന്തര കാർ വിപണിയിൽ ഇടിവാണ് ഉണ്ടായതെന്നും സൊസൈറ്റി ഓഫ് ഇന്ത്യൻ ഓട്ടോമൊബൈൽ മാനുഫാക്ചേഴ്സ് പുറത്തുവിട്ട കണക്കുകൾ പറയുന്നു.
6.34 ശതമാനത്തിന്റെ ഇടിവാണ് ആഭ്യന്തര കാർവിപണിയിലുണ്ടായിരിക്കുന്നത്. 2018 ഒക്ടോബറിൽ 1,85,400 യൂണിറ്റുണ്ടായിരുന്നത്, 1,73,649 ലാണ് എത്തിനിൽക്കുന്നത്. മോട്ടർസൈക്കിൾ വിപണിയിൽ കഴിഞ്ഞ മാസം 15.88 ശതമാനത്തിന്റെ കുറവും രേഖപ്പെടുത്തിയിട്ടുണ്ട്. 13,27,758 ഉണ്ടായിരുന്നത് 11,16,970 യൂണിറ്റിലാണ് എത്തി നിൽക്കുന്നത്.
ഇരുചക്ര വാഹനങ്ങളുടെ വിൽപ്പന 12.4 ശതമാനം ഇടിഞ്ഞിട്ടുണ്ട്. 20,53,497 യൂണിറ്റുണ്ടായിരുന്നത് നിലവിൽ 17,57,264 യൂണിറ്റിലാണ് എത്തിയത്. കൊമേഴ്സ്യൽ വാഹനങ്ങളുടെ വിപണിയിൽ 23.31 ശതമാനത്തിന്റെ ഇടിവും ഉണ്ടായിട്ടുണ്ടെന്നും കണക്കുകൾ പറയുന്നു.
യൂട്ടിലിറ്റി വെഹിക്കിൾസ്, യാത്രാ വാഹനങ്ങൾ തുടങ്ങിയവയൊഴികെയിള്ള എല്ലാ വിഭാഗം വാഹനങ്ങളുടെയും വിപണിയിൽ ഇടിവാണ് രേഖപ്പെടുത്തിയിരിക്കുന്നതെന്നും കണക്കുകൾ വ്യക്തമാക്കുന്നു.