പൊള്ളുന്നവില
എബോളയ്‌ക്കെതിരെ പ്രയോഗിച്ച റെംഡെസിവര്‍ നിര്‍മ്മാണത്തിനും വിപണനത്തിനും നിലവില്‍ 2 ഇന്ത്യന്‍ കമ്പനികളായ ഹൈദരാബാദിലെ ഹെറ്റിറോയ്ക്കും സിപ്ലയ്ക്കുമാണ് അനുമതി. ഹെറ്റിറോ ഒരു ഡോസിന് 5400 രൂപയാണ് വിലയിട്ടിരിക്കുന്നത്. ഇതു പ്രകാരം, ഒരു രോഗിയ്ക്ക് ഈ മരുന്നിന് മാത്രം 32,000 രൂപയോളമാണ് ചെലവ് വരിക.
മരുന്നുകളുടെ വില ഇങ്ങനെ
സിപ്ല 5000 രൂപയില്‍ താഴെ വിലയ്ക്ക് മരുന്ന് എത്തിക്കുമെന്ന് അറിയിച്ചിട്ടുണ്ടെങ്കിലും ഇതുവരെ പ്രഖ്യാപിച്ചിട്ടില്ല. ഗ്ലെന്‍മാര്‍ക്ക് ഫാര്‍മസ്യൂട്ടിക്കല്‍സ് നിര്‍മ്മിക്കുന്ന ഫാവിപിരാവിറിനും വില ചെറുതല്ല. നിര്‍ദേശിച്ചിരിക്കുന്ന ഡോസ് അനുസരിച്ച് 15 ദിവസങ്ങളിലായി 130 ഗുളിക വേണം. ഒരെണ്ണത്തിന് 103 രൂപയാണ് വില. ആകെ 13,390 രൂപയാണ് മരുന്നിന് ഒരു മാസം വില.
വില കുറവുള്ള മരുന്നുകള്‍
സൈഡസ് കാഡില, ഇപ്ക ഉള്‍പ്പെടെ ഒട്ടേറെ കമ്പനികള്‍ നിര്‍മ്മിക്കുന്ന ഹൈഡ്രോക്‌സി ക്ലോറോക്വീന്‍ ഗുളികകള്‍ക്കു താരതമ്യേന വില കുറവാണ്. പത്തു ഗുളികകള്‍ക്കു 68 രൂപയാണ് വില. ഡെക്‌സമെത്തസോണും ചെലവ് കുറവാണ്. നിലവില്‍ ഒരു ഡെക്‌സാമെത്തസോണ്‍ ഇഞ്ചക്ഷന് 10 രൂപയാണ് വില.
കേരളത്തിലെ രോഗികള്‍ ആശങ്കപ്പെടേണ്ടതില്ല
കേരളത്തില്‍ അതതു രോഗലക്ഷണങ്ങള്‍ക്കുള്ള മരുന്നുകളും ചില ആന്റിവൈറല്‍ മരുന്നുകളുമാണ് നല്‍കുന്നത്. ചികിത്സ പൂര്‍ണ്ണമായും സര്‍ക്കാര്‍ ആശുപത്രിയിലായതിനാല്‍ രോഗിയ്ക്ക് ആശങ്കപ്പെടേണ്ടതില്ല. എന്നാല്‍, സ്ഥിതി രൂക്ഷമായ നഗരങ്ങളില്‍ ആരോഗ്യമന്ത്രാലയം ശുപാര്‍ശ ചെയ്തിട്ടുള്ള ബദല്‍ മരുന്നുകള്‍ പലതും വ്യാപകമായി ഉപയോഗിക്കുന്നുണ്ട്.