മുംബൈ: വിമാനത്തിനുള്ളില്‍ വച്ച് പരസ്യമായി സ്‍നേഹ പ്രകടനങ്ങള്‍ നടത്തിയ പൈലറ്റിനെയും ഫ്ളൈറ്റ് അറ്റന്‍ഡന്‍റിനെയും ജോലിയില്‍ നിന്ന് പുറത്താക്കി. യാത്രക്കാര്‍ നല്‍കിയ പരാതിയെ തുടര്‍ന്നാണ് നടപടി. സ്പൈസ് ജെറ്റിന്‍റെ ഡല്‍ഹി-കൊല്‍ക്കത്ത വിമാനത്തില്‍ കഴിഞ്ഞ മാസമായിരുന്നു സംഭവം. ഡ്യൂട്ടിയില്‍ ഇല്ലാതിരുന്ന പൈലറ്റും ഡ്യൂട്ടിയിലുണ്ടായിരുന്ന ഫ്ളൈറ്റ് അറ്റന്‍ഡന്‍റുമാണ് വിമാനത്തിന്‍റെ ഏറ്റവും പുറകിലെ സീറ്റിലിരുന്ന് പരസ്‍പരം ആലിംഗനം ചെയ്യുകയും സ്നേഹപ്രകടനങ്ങള്‍ നടത്തുകയും ചെയ്‍തത്.
Also Read:'ദീപാവലി ഓഫര്‍'; ഓണ്‍ലൈനായി ഫോണ്‍ ഓര്‍ഡര്‍ ചെയ്‍ത ബിജെപി എംപിക്ക് കിട്ടിയത് രണ്ട് കല്ലുകള്‍
പൈലറ്റ് സാധാരണ വേഷത്തിലും ഫ്ളൈറ്റ് അറ്റന്‍ഡന്‍റ് ഡ്യൂട്ടി യൂണിഫോമിലുമായിരുന്നു. മുന്നിലെ സീറ്റുകളില്‍ ഇരിക്കുന്ന യാത്രക്കാര്‍ക്ക് കാണാന്‍ കഴിയാത്ത വിധത്തിലാണ് ഇവര്‍ പുറകിലെ സീറ്റ് തന്നെ തെരഞ്ഞെടുത്തത്. എന്നാല്‍ വിമാനത്തിനുള്ളില്‍ ഏറ്റവും പിറകിലായുള്ള ശുചിമുറിയിലേക്ക് പോകാനെത്തിയവര്‍ ഇവരുടെ പ്രകടനങ്ങള്‍ കാണാനിടയായി. തുടര്‍ന്ന് യാത്രക്കാരില്‍ ചിലര്‍ ഫ്ളൈറ്റ് അറ്റന്‍ഡന്‍റിനെതിരെ പരാതി നല്‍കുകയായിരുന്നു.
യാത്രക്കാരിലൊരാളും യൂണിഫോമിലുണ്ടായിരുന്ന ഫ്ളൈറ്റ് അറ്റന്‍ഡന്‍റും മോശമായി പെരുമാറിയെന്നായിരുന്നു പരാതി. തുടര്‍ന്ന് കമ്പനി അധികൃതര്‍ നടത്തിയ അന്വേഷണത്തിലാണ് ഫ്ളൈറ്റ് അറ്റന്‍ഡന്‍റിനോടൊപ്പം ഉണ്ടായിരുന്നത് ഫസ്റ്റ് ഓഫീസര്‍ പൈലറ്റാണെന്ന് കണ്ടെത്തിയത്. തുടര്‍ന്ന് ഇരുവരില്‍ നിന്നും വിശദീകരണം തേടുകയും പിന്നീട് പിരിച്ചു വിടുകയുമായിരുന്നു. ജോലി സ്ഥലത്തെ മോശം പെരുമാറ്റത്തിനാണ് നടപടിയെടുത്തിരിക്കുന്നത്.
Also Read: കശ്‍മീരില്‍ ഭീകരരുടെ ഗ്രനേഡ് ആക്രമണമുണ്ടായത് തിരക്കേറിയ റോഡില്‍; സിസിടിവി ദൃശ്യങ്ങള്‍ പുറത്ത്
ജീവനക്കാരുടെ ഇത്തരം സംസ്‍കാര രഹിതമായ പ്രവര്‍ത്തനങ്ങള്‍ കമ്പനിയുടെ സല്‍പേരിനെ ബാധിക്കുന്നതാണെന്ന് അധികൃതര്‍ പറഞ്ഞു. ജോലി സമയത്തെ മര്യാദകള്‍ പാലിക്കുന്നതില്‍ പൈലറ്റും സഹായിയും പരാജയപ്പെട്ടെന്നും ഇത്തരം നടപടികള്‍ വിമാനത്തിന്‍റെ സുരക്ഷയെ തന്നെ ബാധിക്കുന്നതാണെന്നും വിമാന കമ്പനി അധികൃതര്‍ വ്യക്തമാക്കി.