ജോ ബൈഡനുമായി ഫോണിൽ സംസാരിച്ച് പ്രധാനമന്ത്രി മോദി; കൊവിഡ്-19, കാലാവസ്ഥ വ്യതിയാനം എന്നിവ ചര്‍ച്ചയായി

ന്യൂഡൽഹി: നിയുക്ത പ്രസിഡന്റായി തെരഞ്ഞെടുക്കപ്പെട്ട ജോ ബൈഡനുമായി പ്രധാനമന്ത്രി നരേന്ദ്ര മോദി ഫോണിൽ ചര്‍ച്ച നടത്തി. അമേരിക്കൻ പ്രസിഡന്റ് സ്ഥാനത്തേക്ക് ബൈഡനും വൈസ് പ്രസിഡന്റ് സ്ഥാനത്തേക്ക് കമാല ഹാരിസും ഇലക്ടറൽ കോളേജിൽ ഭൂരിപക്ഷം ലഭിച്ചതിന് പിന്നാലെയാണ് രണ്ട് ലോക നേതാക്കളും തമ്മിൽ ചര്‍ച്ച നടത്തിയത്.

Also Read : സ്‌പുട്‌നിക് വാക്‌സിൻ ഉത്‌പാദനം ഇന്ത്യയിലും? വെളിപ്പെടുത്തലുമായി പുടിൻ, പട്ടികയിൽ ചൈനയും

പ്രധാനമന്ത്രി മോദി തന്നെയാണ് ചര്‍ച്ച നടത്തിയ സംഭവം ട്വിറ്ററിലൂടെ പുറത്തുവിട്ടത്. അമേരിക്കയുമായുള്ള പങ്കാളിത്തം ഇന്ത്യ തുടരുമെന്നും മോദി അറിയിച്ചു.

പ്രധാനമന്ത്രിയുടെ ട്വീറ്റ് ഇങ്ങനെ,

യുഎസ് പ്രസിഡന്റായി തെരഞ്ഞെടുക്കപ്പെട്ട ജോ ബൈഡനുമായി ഫോണിൽ സംസാരിക്കുകയും അഭിനന്ദിക്കുകയും ചെയ്തു. ഇന്തോ-യുഎസ് നയതന്ത്രപരമായ പങ്കാളിത്തത്തോടുള്ള ഉറച്ച പ്രതിബദ്ധത തുടരുമെന്നും കൊവിഡ് -19 മഹാമാരി, കാലാവസ്ഥാ വ്യതിയാനം, ഇന്തോ-പസഫിക് മേഖലയിലെ സഹകരണം എന്നിവ ചർച്ചകള്‍ നടത്തുകയും ചെയ്തു.


വൈസ് പ്രസിഡന്റായി തെരഞ്ഞെടുക്കപ്പെട്ട കമലാ ഹാരിസിനെയും അഭിനന്ദിച്ചു. അവരുടെ ഈ വിജയം ഇന്ത്യൻ അമേരിക്കൻ സമൂഹത്തിന് പ്രചോദനമാണ് എന്നും അദ്ദേഹം ട്വീറ്റ് ചെയ്തു. ഇവരാണ് ഇന്തോ യുഎസ് ബന്ധത്തിന്റെ ശക്തിയെന്നും പ്രധാമന്ത്രി കുറിച്ചു.


Also Read : ബാല്യത്തില്‍ മഹാഭാരതവും രാമായണവും കേട്ടിരുന്നതായി ബരാക് ഒബാമ; വെളിപ്പെടുത്തല്‍ പുതിയ പുസ്‍തകത്തില്‍

പ്രധാനമന്ത്രി നരേന്ദ്ര മോദി ജോ ബൈഡനുമായി അവസാനം കൂടിക്കാഴ്ച നടത്തിയത് 2014 സെപ്റ്റംബര്‍ 30നായിരുന്നു. അന്ന് അദ്ദേഹം ഒബാമയുടെ വൈസ് പ്രസിഡന്റായിരുന്നു. ഇരു ലോക നേതാക്കളും തമ്മിൽ നയതന്ത്രപരമായ ചര്‍ച്ച നടതത്തുമെന്ന് വിദേശകാര്യ മന്ത്രാലയം നേരത്തെ അറിയിച്ചിരുന്നു.