പേര് 'തല തിരിഞ്ഞ്' പോയി; തറക്കല്ലിടൽ ചടങ്ങിൽ യോഗിയുടെ പേര് തെറ്റിച്ച് മോദി, വൈറലായി വീഡിയോ

അയോധ്യ: അയോധ്യയിലെ രാമക്ഷേത്ര നിർമാണത്തിൻ്റെ തറക്കല്ലിടൽ ചടങ്ങിൽ ഉത്തർപ്രദേശ് മുഖ്യമന്ത്രി യോഗി ആദിത്യനാഥിൻ്റെ പേര് തെറ്റിച്ച് പറഞ്ഞ് പ്രധാനമന്ത്രി നരേന്ദ്ര മോദി. പ്രസംഗത്തിൽ യോഗി ആദിത്യനാഥ് എന്നതിന് പകരമായി 'ആദിത്യ യോഗിനാഥ്' എന്നാണ് മോദി പറഞ്ഞത്. സംഭവത്തിൻ്റെ ദൃശ്യങ്ങൾ സമൂഹമാധ്യമങ്ങളിൽ വൈറലാകുകയാണ്.

Also Read: ജമ്മു കശ്‌മീരിൽ ബിജെപി നേതാവിനെ തീവ്രവാദികൾ വെടിവെച്ച് കൊന്നു; വെടിയേറ്റത് വീടിന് സമീപത്തുവച്ച്

ഉത്തർപ്രദേശിൻ്റെ ഊർജസ്വലനും ജനപ്രിയനുമായ മുഖ്യമന്ത്രി ആദിത്യ യോഗിനാഥ് ജി എന്നാണ് പ്രധാനമമന്ത്രി നരേന്ദ്ര മോദി തെറ്റിച്ച് വിളിച്ചത്. ഇതിന് പിന്നാലെ സമൂഹമാധ്യമങ്ങളിൽ ഈ വീഡിയോ ക്ലിപ് വൈറലയി. ട്വിറ്ററിലൂടെയാണ് കൂടുതലാളുകൾ ക്ലിപ് പങ്കുവച്ചത്.


ബുധനാഴ്‌ചയാണ് രാമക്ഷേത്ര നിർമാണത്തിനായുള്ള തറക്കില്ലിടൽ ചടങ്ങും പ്രത്യേക പൂജകളും നടന്നത്. രാമ ജന്മഭൂമിയിൽ തയ്യാറാക്കിയ പ്രത്യേക വേദിയിൽ പുതിയ ക്ഷേത്രത്തിൻ്റെ ഭൂമിപൂജ പ്രധാനമന്ത്രി നടത്തി. 12.44നും 12.45നും ഇടയിലുള്ള 32 സെക്കൻഡ് ദൈർഘ്യമുള്ള മുഹൂർത്തത്തിലായിരുന്നു ചടങ്ങ്. ക്ഷേത്രനിര്‍മാണത്തിന് തുടക്കം കുറിച്ചു കൊണ്ട് പാകാനായി ഒൻപത് കല്ലുകളാണ് പാകിയത്. പ്രധാനശിലയും എട്ട് ഉപശിലകളുമാണ് സ്ഥാപിച്ചത്. 2000 പുണ്യസ്ഥലങ്ങളിൽ നിന്ന് മണ്ണും 1500 ഇടങ്ങളിൽനിന്ന് വെള്ളവും ഭൂമി പൂജയ്ക്കായി എത്തിച്ചു.

Also Read: മുർമുവിന്‍റെ രാജി സ്വീകരിച്ചു; മനോജ് സിൻഹ പുതിയ ജമ്മു കശ്മീര്‍ ലഫ്.ഗവര്‍ണര്‍

ഉത്തർ പ്രദേശ് മുഖ്യമന്ത്രി യോഗി ആദിത്യനാഥും ഗവർണർ ആനന്ദിബെൻ പട്ടേലും അടക്കമുള്ള നേതാക്കൾ പരിപാടിയിൽ പങ്കെടുത്തു. ആർഎസ്എസ് അധ്യക്ഷൻ മോഹൻ ഭാഗവത്, യുപി ഗവർണർ ആനന്ദി ബെൻ പട്ടേൽ, രാമക്ഷേത്ര നിർമാണ ട്രസ്‌റ്റ് അധ്യക്ഷൻ മഹന്ത് നൃത്യഗോപാൽ ദാസ് എന്നിവരും ഭൂമി പൂജയിൽ പങ്കെടുത്തു. സുപ്രീം കോടതി വിധിയുടെ അടിസ്ഥാനത്തിൽ മൂന്ന് വര്‍ഷം കൊണ്ട് ക്ഷേത്രത്തിൻ്റെ നിര്‍മാണം പൂര്‍ത്തിയാക്കാനാണ് പദ്ധതി.