കൊവിഡ് വാക്സിൻ നിര്‍മിക്കാനും വികസിപ്പിക്കാനും ഇന്ത്യ മുന്നിലുണ്ടാകും: പ്രധാനമന്ത്രി മോദി

ന്യൂഡൽഹി: കൊവിഡ്-19 വാക്സിൻ ഉത്പാദനത്തിൽ ഇന്ത്യയ്ക്ക് സുപ്രധാന പങ്കുണ്ടാകുമെന്ന് പ്രധാനമന്ത്രി നരേന്ദ്ര മോദി. വാക്സിൻ ഗവേഷണത്തിലും വ്യാവസായിക ഉത്പാദനത്തിലും ഇന്ത്യയ്ക്ക് നിര്‍ണായക പങ്കുണ്ടാകുമെന്നും ആഗോളരംഗത്തെ തിരിച്ചു വരവിൽ ഇന്ത്യ മുൻനിരയിലുണ്ടാകുമെന്നും മോദി പറഞ്ഞു.

ഇന്ത്യൻ കമ്പനികള്‍ വാക്സിൻ വികസിപ്പിക്കാനുള്ള ആഗോളശ്രമത്തിൽ വലിയ പങ്കു വഹിക്കന്നുണ്ടെന്നും വാക്സിൻ വികസിപ്പിച്ചു കഴിഞ്ഞാൽ അത് വൻതോതിൽ ഉത്പാദിപ്പിക്കാനും ഇന്ത്യൻ കമ്പനികള്‍ മുൻനിരയിലുണ്ടാകുമെന്നും മോദി പറഞ്ഞു. ഇന്ത്യ ഗ്ലോബല്‍ വീക്ക് 2020 ഉച്ചകോടിയിലായിരുന്നു മോദിയുടെ പ്രതികരണം.

Also Read: മഴ അതിശക്തം: നേപ്പാളില്‍ മണ്ണിടിച്ചിലും വെള്ളപ്പൊക്കവും; 10 മരണം, 40 പേരെ കാണാനില്ല

ഒന്നേകാൽ കോടിയിലധികം പേരെ ബാധിച്ച കൊവിഡ്-19 നെതിരെ ഫലപ്രദമായ വാക്സിൻ കണ്ടെത്താനുള്ള ശ്രമം തുടരുന്നതിനിടെയാണ് പ്രധാനമന്ത്രിയുടെ വാക്കുകള്‍. യുകെ കമ്പനിയായ ആസ്ട്രസെനക്കയും ഓക്സ്ഫോര്‍ഡ് സര്‍വകലാശാലയും ചേര്‍ന്ന് വികസിപ്പിക്കുന്ന കൊവിഡ് -19 വാക്സിൻ വ്യാവസായികാടിസ്ഥാനത്തിൽ നിര്‍മിക്കാൻ പൂനെ ആസ്ഥാനമായ സിറം ഇൻസ്റ്റിറ്റ്യൂട്ട് ഓഫ് ഇന്ത്യയുമായി കരാറുണ്ട്. മൂന്നാം ഘട്ട ക്ലിനിക്കൽ പരീക്ഷണ ഘട്ടത്തിലുള്ള വാക്സിൻ ഇതിനോടകം കമ്പനി വൻതോതിൽ ഉത്പാദനം ആരംഭിച്ചെന്നാണ് റിപ്പോര്‍ട്ടുകള്‍. ലോകത്ത് കൊവിഡ് വാക്സിൻ ഗവേഷണത്തിൽ ഏറ്റവും മുന്നിൽ ഈ വാക്സിനാണെന്ന് ലോകാരോഗ്യ സംഘടനയും വ്യകതമാക്കിയിരുന്നു.

Also Read: മുസ്ലിങ്ങളോടുള്ള ക്രൂരത; ചൈനീസ് നേതാക്കള്‍ക്ക് അമേരിക്കന്‍ ഉപരോധം; യുഎസ് -ചൈന പോര് മുറുകുന്നു

ഐസിഎംആര്‍ ഇന്ത്യൻ കമ്പനികളുമായി ചേര്‍ന്ന് വികസിപ്പിച്ചത് അടക്കമുള്ള വാക്സിനുകളും ക്ലിനിക്കൽ പരീക്ഷണഘട്ടത്തിലാണ്. അതേസമയം, ഓഗസ്റ്റ് 15ന് ഇന്ത്യ കൊവിഡ്-19 വാക്സിൻ പുറത്തിറക്കുമെന്ന റിപ്പോര്‍ട്ട് വൻവിവാദമായിരുന്നു.

ഇന്ത്യൻ ഫാര്‍മസ്യൂട്ടിക്കൽ മേഖല ലോകത്തിനു തന്നെ വലിയൊരു മുതൽക്കൂട്ടാണെന്നായിരുന്നു മോദിയുടെ വാക്കുകള്‍. കൊവിഡ്-19 മൂലം തകര്‍ന്ന സമ്പദ്‍‍വ്യവസ്ഥ വീണ്ടും ഉണരാൻ തുടങ്ങിയിട്ടുണ്ടെന്നു പറഞ്ഞ പ്രധാനമന്ത്രി ലോകത്തെ ഏറ്റവും വലിയ തുറന്ന സമ്പദ്‍‍വ്യവസ്ഥയായ ഇന്ത്യ ലോകത്ത് ആഗോള നിക്ഷേപകര്‍ക്ക് നിക്ഷേപത്തിനുള്ള അവസരങ്ങള്‍ ഒരുക്കുകയാണെന്നും പ്രധാനമന്ത്രി പറഞ്ഞു.