വാക്സിൻ നിർമാണം നേരിട്ടു കണ്ടു വിലയിരുത്താൻ മോദി; പൂനെയിലെ കൊവാക്സിൻ ഫാക്ടറി പ്രധാനമന്ത്രി സന്ദർശിക്കും

ന്യൂഡൽഹി: കൊവിഡ് 19നെതിരായ പ്രതിരോധ വാക്സിൻ ഗവേഷണം അന്തിമ ഘട്ടത്തിലെെത്തുന്നതിനിടെ വാക്സിൻ നിര്‍മാണം നേരിട്ടു കണ്ടു വിലയിരുത്താൻ പ്രധാനമന്ത്രി മോദി. ഹൈദരാബാദിലെ ഭാരത് ബയോടെക്കിൻ്റെ വാക്സിൻ നിര്‍മാണകേന്ദ്രമാണ് പ്രധാധമന്ത്രി ശനിയാഴ്ച സന്ദര്‍ശിക്കുന്നത്.

ഇന്ത്യയുടെ ആദ്യ തദ്ദേശീയ കൊവിഡ‍് പ്രതിരോധ വാക്സിനായ കൊവാക്സിൻ നിര്‍മിക്കുന്നത് ഭാരത് ബയോടെക്കാണ്. ഐസിഎംആറിൻ്റെ സഹകരണത്തോടെയാണ് കൊവാക്സിൻ്റെ ഗവേഷണവും നിര്‍മാണവും. ഹൈദരാബാദിലെ ജീനോം വാലിയിലുള്ള വാക്സിൻ നിര്‍മാണ കേന്ദ്രങ്ങള്‍ പ്രധാനമന്ത്രി സന്ദര്‍ശിക്കുന്ന വിവരം വാര്‍ത്താ ഏജൻസിയായ എഎൻഐയാണ് പുറത്തു വിട്ടത്. രാജ്യത്ത് വിതരണം ചെയ്യാനായി തയ്യാറാക്കുന്ന വാക്സിൻ്റെ നിര്‍മാണ പുരോഗതി പ്രധാനമന്ത്രി വിലയിരുത്തുമെന്നാണ് റിപ്പോര്‍ട്ട്.

Also Read: ഇന്ത്യൻ ഐടി വ്യവസായത്തിന്റെ പിതാവ് എഫ്‍സി കോലി അന്തരിച്ചു

നാളെ വൈകിട്ട് നാലു മണിയോടു കൂടിയാണ് പ്രധാനമന്ത്രി ഹൈദരാബാദിലെത്തുകയെന്നാണ് ഹൈദരാബാദ് പോലീസിനെ ഉദ്ധരിച്ചുള്ള എൻഡിടിവി റിപ്പോര്‍ട്ട്. പ്രധാനമന്ത്രി 3.40ന് എത്തുമെന്നാണ് പ്രതീക്ഷിക്കുന്നതെന്നും 4 മണിയ്ക്കും 5 മണിയ്ക്കും ഇടയിൽ വാക്സിൻ ഗവേഷണകേന്ദ്രത്തിൽ സന്ദര്‍ശനം നടത്തുന്ന പ്രധാനമന്ത്രി 5.40ന് മടങ്ങുമെന്നും ഹൈദരാബാദ് പോലീസ് കമ്മീഷണര്‍ വി സി സജ്ജനാര്‍ വാര്‍ത്താ ചാനലിനോടു പറഞ്ഞു.

Also Read: കർഷക മാർച്ച്: സ്റ്റേഡിയങ്ങൾ ജയിലുകളാക്കില്ല; പോലീസ് ആവശ്യം തള്ളി ഡൽഹി സർക്കാർ

ഇതേ ദിവസം തന്നെ പൂനെയിലെ സിറം ഇൻസ്റ്റിറ്റ്യൂട്ട് ഓഫ് ഇന്ത്യയുടെ നിര്‍മാണ കേന്ദ്രവും പ്രധാനമന്ത്രി സന്ദര്‍ശിക്കുന്നുണ്ടെന്നാണ് എൻഡിടിവി റിപ്പോര്‍ട്ടിൽ പറയുന്നത്. ഇവിടെയാണ് ഓക്സ്ഫഡ് സര്‍വകലാശാലയും ബ്രിട്ടീഷ് കമ്പനിയായ ആസ്ട്രസെനക്കയും ചേര്‍ന്ന് വികസിപ്പിച്ച വാക്സിൻ ഉത്പാദിപ്പിക്കുന്നത്. ഈ വാക്സിൻ 2021 ഏപ്രിൽ മാസത്തോടു കൂടി വിതരണത്തിന് തയ്യാറാകുമെന്നാണ് പ്രതീക്ഷിക്കുന്നത്. വാക്സിന് അവസാനഘട്ട ക്ലിനിക്കൽ പരീക്ഷണത്തിൽ 70 ശതമാനം ഫലപ്രാപ്തിയുണ്ടെന്നും കണ്ടെത്തിയിരുന്നു.

പ്രധാനമന്ത്രിയുടെ സന്ദര്‍ശനത്തിന് മുന്നോടിയായി ഹൈദരാബാദിലെയും തൊട്ടുചേര്‍ന്നു കിടക്കുന്ന പിംപ്രി ചിംച്വാദിലെയും പോലീസ്, റവന്യൂ ഉദ്യോഗസ്ഥര്‍ ചേര്‍ന്ന് ഒരുക്കങ്ങള്‍ വിലയിരുത്തിയതായി ഇന്ത്യൻ എക്സ്പ്രസ് റിപ്പോര്‍ട്ട് ചെയ്തു.