കോഴക്കേസ് പ്രതി അസ്താന മോഡിയുടെ കണ്ണിലുണ്ണിയെന്ന് രാഹുല്‍

ന്യൂഡല്‍ഹി: കോഴക്കേസില്‍ പ്രതി ചേര്‍ക്കപ്പെട്ട സിബിഐ സ്പെഷ്യല്‍ ഡയറക്ടര്‍ രാകേഷ് അസ്താനയും മോദിയും തമ്മില്‍ അവിശുദ്ധ ബന്ധമെന്ന ആരോപണവുമായി കോണ്‍ഗ്രസ് അധ്യക്ഷന്‍ രാഹുല്‍ ഗാന്ധി രംഗത്ത്. അസ്താന നരേന്ദ്ര മോദിയുടെ കണ്ണിലുണ്ണിയാണെന്ന് രാഹുല്‍ വിമര്‍ശിച്ചു. ട്വിറ്ററിലൂടെയായിരുന്നു രാഹുലിന്‍റെ ആരോപണം. അസ്താനയുമായി ചേര്‍ത്ത് നേരത്തേയും മോദിക്കെതിരെ രാഹുല്‍ നിരവധി ആരോപണമുന്നയിച്ചിരുന്നു.

ഗുജറാത്ത് കലാപം അന്വേഷിച്ച പ്രത്യേക തലവന്‍ എന്ന നിലയില്‍ മോദിക്ക് പ്രിയപ്പെട്ടവനാണ് അസ്താന. ഇതുവഴിയാണ് സിബിഐയിലെ രണ്ടാമന്‍ പദവിയിലേക്ക് ഇയാള്‍ നുഴഞ്ഞുകയറിയത്. എന്നാല്‍ പ്രധാനമന്ത്രിയുടെ കണ്ണിലുണ്ണിയായ അസ്താന ഇപ്പോള്‍ കോഴക്കേസില്‍ പിടിക്കപ്പെട്ടിരിക്കുകയാണെന്നും രാഹുല്‍ ട്വിറ്ററില്‍ കുറിച്ചു. രാഷ്ട്രീയ വിരോധം തീര്‍ക്കാനുള്ള ആയുധമായി മോദി സിബിഐയെ ഉപയോഗിക്കുകയാണെന്നും രാഹുല്‍ ആരോപിച്ചു.