ഒരു രാജ്യം, ഒരു തെരഞ്ഞെടുപ്പ് സർക്കാരിന്റെ അജണ്ടയല്ല; രാജ്യത്തിന്റേതെന്ന് മോദി

ന്യൂഡൽഹി: ഒരു രാജ്യം, ഒരു തെരഞ്ഞെടുപ്പ് എന്ന ആശയം നടപ്പാക്കുന്നതിന് പ്രധാനമന്ത്രി നരേന്ദ്ര മോദിയുടെ നേതൃത്വത്തിൽ സമിതിയുണ്ടാക്കാൻ സർവ്വകക്ഷി യോഗത്തിൽ തീരുമാനം. സമിതി വിവിധ രാഷ്ട്രീയ കക്ഷികളുമായും ചർച്ച നടത്തും.

ഒരു രാജ്യം ഒരു തെരഞ്ഞെടുപ്പ് എന്നത് സർക്കാരിന്റെ അജണ്ടയല്ല. രാജ്യത്തിന്റെ അജണ്ടയാണെന്ന് പ്രധാനമന്ത്രി നരേന്ദ്ര മോദി യോഗത്തിൽ പറഞ്ഞു. കോൺഗ്രസ് അടക്കം വിവിധ കക്ഷികൾ യോഗം ബഹിഷ്ക്കരിച്ചു. 21 കക്ഷികൾ യോഗത്തിൽ പങ്കെടുത്തുവെന്ന് വ്യക്തമാക്കിയ രാജ്നാഥ് സിങ് മൂന്ന് കക്ഷികൾ അഭിപ്രായം എഴുതി അറിയിച്ചെന്നും വ്യക്തമാക്കി.

വിഷയത്തിന്റെ എല്ലാ വശങ്ങളും പഠിക്കുകയും പരിഹാരം കണ്ടെത്താൻ ശ്രമിക്കുകയുമാണ് സമിതി രൂപീകരിക്കുന്നതിന്റെ ലക്ഷ്യം. എല്ലാ അഭിപ്രായ വ്യത്യാസങ്ങളേയും തങ്ങൾ മാനിക്കും. ഭൂരിപക്ഷം പാർട്ടികളും ആശയത്തോട് യോജിച്ചു. ആശയം നടപ്പാക്കുന്നത് സംബന്ധിച്ച് ഇടതു പാർട്ടികൾ ചോദ്യം ഉന്നയിച്ചെന്നും രാജ്നാഥ് സിങ് പറഞ്ഞു.

ജനാധിപത്യ വിരുദ്ധവും പ്രായോഗികമായി നടപ്പാക്കാൻ തടസ്സവുമുള്ള ഇത്തരമൊരു ആശയം നടപ്പാക്കുന്നതിന് കൂടുതൽ ചർച്ച ആവശ്യമാണെന്ന് യോഗം ബഹിഷ്ക്കരിച്ച കോൺഗ്രസ് പറഞ്ഞു. രാജ്യം നേരിടുന്ന പ്രശ്നങ്ങളിൽനിന്നും ശ്രദ്ധതിരിക്കാനാണ് സർക്കാർ ശ്രമിക്കുന്നതെന്നും കോൺഗ്രസ് ആരോപിച്ചു.