പിഎൻബി തട്ടിപ്പ്: പ്രിയങ്ക ചോപ്രയെ ചോദ്യം ചെയ്യണമെന്ന് സ്വാമി

ന്യൂഡൽഹി: പഞ്ചാബ് നാഷണൽ ബാങ്കിൽ നിന്ന് വജ്രവ്യാപാരി നീരവ് മോദി 11400 കോടി രൂപയുടെ തട്ടിപ്പ് നടത്തിയ കേസിൽ ബോളിവുഡ് നടി പ്രിയങ്ക ചോപ്രയെ ചോദ്യം ചെയ്യണമെന്ന് സുബ്രഹ്മണ്യൻ സ്വാമി. നീരവ് മോദി തട്ടിപ്പ് നടത്തിയപ്പോൾ ധനമന്ത്രി അരുൺ ജെയ്റ്റ്ലി ഉറക്കം തൂങ്ങുകയായിരുന്നോയെന്നും സ്വാമി തുറന്നടിച്ചു. നീരവ് മോദിയെ പിടികിട്ടാപ്പുള്ളിയായി പ്രഖ്യാപിച്ച് ഇന്ത്യയിലെ മുഴുവൻ സ്വത്തുക്കൾ കണ്ടുകെട്ടണമെന്നും സ്വാമി പറഞ്ഞു.

കേസിൽ ധനമാത്രാലയത്തിനും റിസർവ് ബാങ്കിന് വീഴ്‌ച സംഭവിച്ചെന്ന് സ്വാമി പറഞ്ഞു. നീരവ് മോദി അമേരിക്കയിൽ പൗരത്വം സ്വീകരിച്ചാലും ഇന്ത്യയിൽ എത്തിക്കാൻ വഴികളുണ്ട്. നിയമനടപടി സ്വീകരിക്കുമെന്ന് പറയുന്നതല്ലാതെ എന്ത് നടപടിയാണ് സ്വീകരിക്കുന്നതെന്ന് ധനമന്ത്രി അരുൺ ജെയ്റ്റ്ലി വ്യക്തമാക്കണമെന്ന് സുബ്രഹ്മണ്യൻ സ്വാമി പറഞ്ഞു. ധനമന്ത്രാലയത്തിനു കഴിയുന്നില്ലെങ്കില്‍ തന്നെ ചുമതലപ്പെടുത്തിയാല്‍ പണം എങ്ങനെ തിരിച്ചെത്തിക്കാമെന്ന് കാണിച്ചു തരാമെന്നും സ്വാമി പറഞ്ഞു. നീരവ് മോദിയുടെ വജ്രാഭരണശാലയുടെ ആഗോള ബ്രാൻഡ് അംബാസഡറാണ് പ്രിയങ്ക ചോപ്ര.