സക്കീര്‍ നായിക്കിന്‍റെ ഓഫീസിനു ചുറ്റും പോലീസിനെ വിന്യസിച്ചു

മുംബൈ: ഇസ്ലാം മതപ്രഭാഷകനായ സക്കീര്‍ നായിക്കിന്‍റെ മുംബൈയിലെ ഓഫീസിനു പുറത്ത് പോലീസിനെ വിന്യസിച്ചു. നായിക്കിന്‍റെ പ്രഭാഷണങ്ങള്‍ ധാക്കയിലും ഹൈദരാബാദിലും പിടിയിലായ ഐഎസ് അംഗങ്ങളെ ഭീകരവാദത്തിലേക്ക് ആകര്‍ഷിച്ചു എന്ന വെളിപ്പടുത്തലിന്‍റെ വെളിച്ചത്തിലാണ് ഈ പുതിയ നീക്കം.

തെക്കേമുംബൈയിലെ ഡോങ്ക്രീ പ്രദേശത്തുള്ള ഇസ്ലാമിക് റിസര്‍ച്ച് സെന്‍ററിന് പുറത്ത് പോലീസ് സേനയെ വിന്യസിച്ചിട്ടുണ്ടെന്ന് മുംബൈയിലെ പോലീസ് നേതൃത്വം മാധ്യമങ്ങളോട് പറഞ്ഞു. "ഇതിനായി പോലീസിന് സര്‍ക്കാരിന്‍റെ ഭാഗത്ത് നിന്നും പ്രത്യേക നിര്‍ദ്ദേശങ്ങള്‍ ഒന്നും ലഭിച്ചിട്ടില്ല. ഭീകരരുടെ വെളിപ്പെടുത്തലുകളുടെ വെളിച്ചത്തില്‍ മുംബൈ പോലീസ് മുന്‍കരുതല്‍ എടുത്തു എന്നു മാത്രം" - മുതിര്‍ന്ന പോലീസ് ഉദ്യോഗസ്ഥര്‍ കൂട്ടിച്ചേര്‍ത്തു.

കേന്ദ്ര ഏജന്‍സികളുടെ സൂക്ഷ്മ നിരീക്ഷണം സക്കീര്‍ നായിക്കിന്‍റെ പ്രസംഗങ്ങള്‍ക്കു മേല്‍ ഉണ്ടെന്ന് കേന്ദ്ര ആഭ്യന്തരമന്ത്രി കിരണ്‍ റിജിജു അറിയിച്ചു. ഇതു സംബന്ധിച്ച് എന്ത് നടപടിയാണ് സ്വീകരിക്കാന്‍ പോകുന്നതെന്ന് മാധ്യമങ്ങളെ മുന്‍കൂട്ടി അറിയിക്കാന്‍ സാധിക്കില്ലെന്നും അദ്ദേഹം പറഞ്ഞു.