തങ്ങള്‍ക്കെതിരെ പോലീസ് കള്ളത്തെളിവുണ്ടാക്കിയെന്ന് സുധാ ഭരദ്വാജ്

ന്യൂഡൽഹി: തനിക്കും അറസ്റ്റിലായ നാല് മനുഷ്യാവകാശ പ്രവര്‍ത്തകര്‍ക്കും മാവോയിസ്റ്റ് ബന്ധമുണ്ടെന്ന് ആരോപിക്കുന്ന പോലീസിന്‍റെ കൈവശമുള്ള തെളിവുകള്‍ കെട്ടിച്ചമച്ചതാണെന്ന് അഭിഭാഷക സുധാ ഭരദ്വാജ്. അറസ്റ്റിലായവരുടെ മാവോയിസ്റ്റ് ബന്ധം തെളിയിക്കുന്ന ആയിരക്കണക്കിന് കത്തുകളും രേഖകളും ലഭിച്ചെന്നാണ് മഹാരാഷ്ട്രാ പോലീസ് പറയുന്നത്.

അതേസമയം, മാവോയിസ്റ്റ് ബന്ധത്തിന് തെളിവായി പോലീസ് ഉയര്‍ത്തിക്കാട്ടുന്ന കത്ത് വ്യാജമാണെന്നാണ് സുധാ ഭരദ്വാജ് വാദിക്കുന്നത്. നിലവിൽ ഫരീദാബദിൽ വീട്ടുതടങ്കലിലാണ് സുധാ ഭരദ്വാജ് ഉള്‍പ്പെടെയുള്ളവര്‍. സുധ ഭരദ്വാജ് തന്‍റെ അഭിഭാഷകയായ വൃന്ദാ ഗ്രോവര്‍ക്ക് സ്വന്തം കൈപ്പടയിലെഴുതിയ കത്തിൽ ഇക്കാര്യം വ്യക്തമാകുന്നതായി എൻഡിടിവി റിപ്പോര്‍ട്ട് ചെയ്തു.


നിരോധിത മാവോയിസ്റ്റ് ഗ്രൂപ്പുകളുമായി ബന്ധമുണ്ടെന്നുള്ള കൃത്യമായ തെളിവിന്‍റെ അടിസ്ഥാനത്തിലാണ് അഞ്ച് മനുഷ്യാവകാശ പ്രവര്‍ത്തകരെ കസ്റ്റഡിയിലെടുത്തതെന്ന് മഹാരാഷ്ട്ര പോലീസ് വെള്ളിയാഴ്ച പറഞ്ഞിരുന്നു. ഇവര്‍ മാവോയിസ്റ്റുകളുമായി അടുത്തിടപഴകി പ്രവര്‍ത്തിച്ചിരുന്നുവെന്നും അവര്‍ക്ക് വേണ്ട ആയുധങ്ങളും ഗ്രനേഡുകളും അറസ്റ്റിലായവര്‍ എത്തിച്ചു നല്‍കിയിരുന്നുവെന്നും മഹാരാഷ്ട്ര അഡീഷണൽ ഡയറക്ടര്‍ ജനറൽ ഓഫ് പോലീസ് പരംബീര്‍ സിങ് വാര്‍ത്താ സമ്മേളനത്തിൽ പറഞ്ഞിരുന്നു. ഇതുസംബന്ധിച്ച തെളിവുകള്‍ പോലീസ് പിടിച്ചെടുത്തിട്ടുണ്ടെന്നും അദ്ദേഹം പറഞ്ഞു.

മഹാരാഷ്ട്രയിലെ ഭീമാ കൊരേഗാവ് സംഘര്‍ഷവുമായി ബന്ധപ്പെട്ടാണ് അഞ്ച് മനുഷ്യാവകാശപ്രവര്‍ത്തകരെ ചൊവ്വാഴ്ച പോലീസ് അറസ്റ്റ് ചെയ്തത്. തെലുഗു കവി വരവരറാവു, അഭിഭാഷക സുധാ ഭരദ്വാജ്, സന്നദ്ധപ്രവര്‍ത്തകരായ വെര്‍ണൻ ഗോൺസാൽവസ്, അരുൺ ഫെരേര, മാധ്യമപ്രവര്‍ത്തകൻ ഗൗതം നവ്ലാഖ എന്നിവരാണ് അറസ്റ്റിലായത്.