പബ്ബിന്റെ സീലിങ് തകര്‍ന്ന് 3 മരണം; അപകട കാരണമായത് മെട്രോ തുരങ്ക നിർമ്മാണം?

ചെന്നൈ: തമിഴ്‌നാട്ടിലെ ആല്‍വാര്‍പേട്ടില്‍ പബ്ബിന്റെ സീലിങ് തകര്‍ന്ന് മൂന്ന് മരണം. കെട്ടിടത്തിന്റെ ഒന്നാം നിലയുടെ മേല്‍ക്കൂരയാണ് തകര്‍ന്നുവീണത്. ഡിണ്ടിഗൽ സ്വദേശിയായ സൈക്ലോൺ രാജ്, മണിപ്പൂരിൽ നിന്നുള്ള മാക്സ്, ലോലി എന്നിവരാണ് മരണപ്പെട്ടതെന്ന് റിപ്പോർട്ടുകൾ പറയുന്നു.

നിരവധി പേർക്ക് പരിക്കേറ്റിട്ടുണ്ടെന്നാണ് വിവരം. പരിക്കേറ്റവരെ സമീപത്തുള്ള റോയൽപേട്ട ആശുപത്രിയിലേക്ക് മാറ്റിയിട്ടുണ്ട്.

സമീപത്തായി നടന്നുവരുന്ന മെട്രോ തുരങ്ക നിർമ്മാണമാണ് അപകടത്തിന് കാരണമായതെന്ന് പ്രാഥമിക റിപ്പോര്‍ട്ടുകൾ പറയുന്നു. ഇവിടെ നിന്നുള്ള കമ്പനം മൂലമാണ് ബാറിന്റെ സീലിങ് തകർന്നത്. ഷെക്ക്മെറ്റ് എന്ന പബ്ബിന്റെ മേൽക്കൂരയാണ് തകർന്നത്.

അതെസമയം മരിച്ചവരുടെയും പരിക്കേറ്റവരുടെയും കൃത്യമായ വിവരങ്ങൾ ലഭിക്കാൻ കാത്തിരിക്കേണ്ടി വരും. അവശിഷ്ടങ്ങള്‍ക്കിടയില്‍ ആരെങ്കിലും കുടുങ്ങിക്കിടക്കുന്നുണ്ടോയെന്ന് പരിശോധിച്ചുവരികയാണ്. ബാറിന്റെ പ്രവര്‍ത്തന സമയത്തിലായിരുന്നു അപകടം.

രാത്രി എട്ടുമണിയോടെയാണ് അപകടം നടന്നത്. ദേശീയ ദുരന്തനിവാരണ സേനയും അഗ്നിരക്ഷാ സേനയും ചേർന്നാണ് രക്ഷാപ്രവർത്തനം നടത്തുന്നത്. ഈസ്റ്റ് ചെന്നൈ ജോയിന്റ് കമ്മീഷണർ ജി ധർമ്മരാജന്റെ നേതൃത്വത്തിലുള്ള പോലീസ് സംഘം സ്ഥലത്ത് രക്ഷാപ്രവർത്തനത്തിന് നേതൃത്വം നൽകുന്നുണ്ട്.