'രാമരാജ്യവും യമരാജ്യവും'; കേരളത്തെയും യോഗിയുടെ യുപിയെയും താരതമ്യപ്പെടുത്തി പ്രശാന്ത് ഭൂഷൺ

ന്യൂഡൽഹി: തുടര്‍ച്ചയായി നാലാം വട്ടവും കേരളം ഭരണ നിർവഹണത്തിൽ ഒന്നാമത് എത്തിയതിന് പിന്നാലെ ബിജെപി ഭരിക്കുന്ന ഉത്തർപ്രദേശിനെ പരിഹസിച്ച് മുതിർന്ന അഭിഭാഷകൻ പ്രശാന്ത് ഭൂഷൺ. 'മികച്ച ഭരണം കേരളത്തിൽ, മോശം ഉത്തർപ്രദേശ്, രാമരജ്യം VS യമരാജ്യം' - എന്നായിരുന്നു അദ്ദേഹത്തിൻ്റെ ട്വീറ്റ്.

Also Read: പുല്‍വാമയില്‍ രാജ്യം വേദനിച്ചപ്പോള്‍ ചിലര്‍ വൃത്തികെട്ട രാഷ്ട്രീയം കളിച്ചു: പ്രധാനമന്ത്രി

ബെംഗളൂരു ആസ്ഥാനമായ പബ്ലിക് അഫയേഴ്‌സ് ഇൻഡക്‌സ് തയ്യാറാക്കിയ പട്ടികയിൽ കേരളം ഒന്നാമത് എത്തിയ റിപ്പോർട്ട് പുറത്ത് വന്നതിന് പിന്നാലെയാണ് പ്രശാന്ത് ഭൂഷൺ യുപിയെ പരിഹസിച്ച് രംഗത്ത് എത്തിയത്. കേരളത്തിന് പുറമെ, തമിഴ്‌നാട്, ആന്ധ്രാപ്രദേശ്, കര്‍ണാടക എന്നീ ദക്ഷിണേന്ത്യൻ സംസ്ഥാനങ്ങളാണ് ആദ്യ നാല് സ്ഥാനങ്ങളിലുള്ളത്.


പട്ടികയിൽ ഏറ്റവും അവസാനമുള്ള സംസ്ഥാനം യോഗി ആദിത്യനാഥ് ഭരിക്കുന്ന ഉത്തര്‍പ്രദേശാണ്. ഉത്തര്‍പ്രദേശിന് പിന്നാലെ ഒഡീഷ, ബിഹാ‍ർ എന്നീ സംസ്ഥാനങ്ങളും പട്ടികയിൽ പിന്നിലെയുണ്ട്. നീതി, വളര്‍ച്ച, സുസ്ഥിരത എന്നീ മൂന്ന് ഘടകങ്ങളുടെ അടിസ്ഥാനത്തിലാണ് പബ്ലിക് അഫയേഴ്സ് സെന്റര്‍ ഭരണനിര്‍വഹണനിലവാരം വിശകലനം ചെയ്‌തത്.

Also Read: ബിജെപിയുടെ സൗജന്യ കൊവിഡ് വാക്‌സിന്‍ വാഗ്ദാനം ചട്ടലംഘനമല്ലെന്ന് തെരഞ്ഞെടുപ്പ് കമ്മീഷന്‍

2020ലെ പൊതുകാര്യ സൂചിക പ്രകാരമാണ് ഭരണ നിർവഹണത്തിൽ വലിയ സംസ്ഥാനങ്ങളുടെ വിഭാഗത്തില്‍ കേരളം ഒന്നാമതുള്ളത്. കേരളത്തിന് ലഭിച്ച നേട്ടത്തിൽ മുഖ്യമന്ത്രി പിണറായി വിജയൻ ഫേസ്‌ബുക്കിൽ കുറിച്ചിരുന്നു. "കേരളം ഒരിക്കൽ കൂടി ഭരണമികവിനുള്ള അംഗീകാരത്തിന്റെ നിറവിലാണ്. ഇന്നു പുറത്തു വന്ന പബ്ലിക് അഫയേഴ്‌സ് ഇൻഡക്‌സിൽ രാജ്യത്തെ ഏറ്റവും മികച്ച ഭരണമുള്ള സംസ്ഥാനമായി കേരളത്തെ വീണ്ടും തെരഞ്ഞെടുത്തു. തുടർച്ചയായി നാലാം വട്ടമാണ് കേരളം ഈ നേട്ടം കൈവരിക്കുന്നത്" - എന്നും ആദേഹം പറഞ്ഞു.