തന്നെ വേട്ടയാടി കൊല്ലാൻ ശ്രമിക്കുന്നെന്ന് പ്രവീൺ തൊഗാഡിയ

അഹമദാബാദ്: ഏറ്റുമുട്ടൽ നടത്തി തന്നെ വധിക്കാൻ പദ്ധതിയിടുന്നതായി പ്രവീൺ തൊഗാഡിയ. 10 വർഷത്തോളം പഴക്കമുള്ള കേസുകളിൽ തന്നെ വേട്ടയാടുന്നുവെന്നും വിശ്വഹിന്ദു പരിഷത്ത് വർക്കിങ്ങ് പ്രസിഡന്‍റ് ആരോപിച്ചു.

പത്ത് വർഷം മുൻപ് രാജസ്ഥാനിൽ അധികാരത്തിലുണ്ടായിരുന്ന കോൺഗ്രസ് സർക്കാർ പുറപ്പെടുവിച്ച നിരോധനാജ്ഞ തൊഗാഡിയ ലംഘിച്ചിരുന്നു. ഇതിൽ അറസ്റ്റ് വാറണ്ടും പുറപ്പെടുവിച്ചിരുന്നു. ഈ വാറണ്ടുമായി രാജസ്ഥാൻ പോലീസ് അഹമദാബാദിൽ എത്തിയപ്പോഴാണ് തോഗഡിയയെ കാണാനില്ലെന്ന് അറിയുന്നത്. തൊഗാഡിയയെ കാണാൻ ഇല്ലെന്നും പിന്നീട് പാർക്കിൽ അബോധാവസ്ഥയിൽ കണ്ടെത്തിയെന്നും വാർത്തയുണ്ടായിരുന്നു.

ഇന്നലെ രാവിലെ പൂജ ചെയ്യുന്നതിനിടെ ഒരാൾ ഓഫീസിലേക്ക് വന്ന് താൻ പോലീസ് ഏറ്റുമുട്ടലിൽ കൊല്ലപ്പെടുമെന്നും തന്നെ അറസ്റ്റ് ചെയ്യാനായി പോലീസ് എത്തിയിട്ടുണ്ടെന്നും അറിയിച്ചതായി തൊഗാഡിയ മാധ്യമങ്ങളോട് പറഞ്ഞു. അവരിൽ നിന്ന് രക്ഷ തേടിയാണ് ഫോൺ ഓഫ് ചെയ്ത ശേഷം ഒളിച്ചോടിയതെന്ന് തൊഗാഡിയ വ്യക്തമാക്കി. തന്നെ അറസ്റ്റ് ചെയ്‌താൽ കലാപമുണ്ടാകുമെന്ന് ഭയപ്പെട്ടതായി തൊഗാഡിയ വെളിപ്പെടുത്തി.

അഭിഭാഷകനുമായ ആലോചിച്ചപ്പോൾ കോടതിയിൽ ഹാജരാകാൻ അറിയിച്ചു. ജയ്‌പൂർ കോടതിയിലേക്ക് പോകാൻ വിമാനത്താവളത്തിലേക്ക് പോകാൻ ശ്രമിച്ചെന്നും പിന്നീടൊന്നും ഓർമയില്ലെന്നും തൊഗാഡിയ വ്യക്തമാക്കി. അബോധാവസ്ഥയിൽ അഹമദാബാദിലെ ഒരു പാർക്കിൽ കിടന്ന തൊഗാഡിയയെ ഇന്നലെ വൈകിട്ട് അജ്ഞാതനായ വ്യക്തിയാണ് ആശുപത്രിയിൽ എത്തിച്ചത്. രക്തത്തിലെ പഞ്ചസാരയുടെ അളവ് കുറഞ്ഞതാണ് മയങ്ങി പോകാൻ കാരണമായതെന്ന് ഡോക്ടർമാർ വ്യക്തമാക്കി.