'കാണാതായ' തൊഗാഡിയയെ കണ്ടെത്തി ആശുപത്രിയില്‍ പ്രവേശിപ്പിച്ചു

അഹമ്മദാബാദ്: കാണാതായെന്ന് വിശ്വ ഹിന്ദു പരിഷത് പ്രവര്‍ത്തകര്‍ പരാതി നല്‍കിയ സംഘടനാ ദേശീയ പ്രസിഡന്‍റ് ഡോ പ്രവീണ്‍ തൊഗാഡിയയെ അഹമ്മദാബാദിലെ ആശുപത്രിയില്‍ പ്രവേശിപ്പിച്ചു. ഷാഹിദാബാദ് ചന്ദ്രമണി ആസ്പത്രിയിലാണ് അദ്ദേഹത്തെ അര്‍ധബോധാവസ്ഥയില്‍ പ്രവേശിപ്പിച്ചത്.

തിങ്കളാഴ്ച്ച വൈകിട്ട് കാണാതായ തൊഗാഡിയയെ അഹമ്മദാബാദിലെ കൊതാര്‍പൂര്‍ ഏരിയയിലെ പാര്‍ക്കിലാണ് അബോധാവസ്ഥയില്‍ കണ്ടെത്തിയത് . തിങ്കളാഴ്ച രാവിലെ പത്തുമണിക്ക് അഹമ്മദാബാദില്‍നിന്ന് പോലീസ് കസ്റ്റഡിയിലെടുത്ത് കൊണ്ടുപോയെന്നാണ് വി എച്ച് പി പ്രവര്‍ത്തകരും പിന്നീട് തൊഗാഡിയയും പരാതിപ്പെട്ടിരുന്നത്.

സര്‍ക്കാര്‍ ഉദ്യോഗസ്ഥന്റെ നിര്‍ദേശമനുസരിച്ചില്ലെന്ന കുറ്റംചുമത്തി നേരത്തേ രാജസ്ഥാന്‍ പോലീസ് തൊഗാഡിയയുടെ പേരില്‍ കേസെടുത്തിരുന്നു. ഈ കേസില്‍ രാജസ്ഥാന്‍ പോലീസ് അറസ്റ്റ് ചെയ്ത് ജയിലിലടച്ചുവെന്നാണ് വിഎച്ച് പിയുടെ ആരോപണം. എന്നാല്‍ തൊഗാഡിയയെ പോലീസ് അറസ്റ്റ് ചെയ്തിട്ടില്ലെന്നും അദ്ദേഹത്തെ കസ്റ്റഡിയിലെടുത്തുവെന്ന ആരോപണം ശരിയല്ലെന്നും സീനിയര്‍ ഒാഫീസര്‍ അലോക് കുമാര്‍ പറഞ്ഞു.