ഇന്ത്യ ഈ സ്വപ്നം യാഥാർഥ്യമാക്കുമെന്ന് എനിക്ക് ഉറപ്പുണ്ട്, ഇനി വിശ്രമമില്ല: പ്രധാനമന്ത്രി മോദി

ന്യൂഡൽഹി: പ്രധാനമന്ത്രി നരേന്ദ്ര മോദി ചെങ്കോട്ടയിൽ നടത്തിയ സ്വാതന്ത്ര്യദിന പ്രസംഗത്തിൽ ഏറ്റവുമധികം ഊന്നിപ്പറഞ്ഞത് ആത്മനിര്‍ഭര്‍ ഭാരത് പദ്ധതിയെപ്പറ്റിയായിരുന്നു. രാജ്യത്തിന് സ്വാതന്ത്ര്യം ലഭിച്ച് 73 വര്‍ഷം പിന്നിടുമ്പോള്‍ സ്വയം പര്യാപ്ത ഇന്ത്യ കെട്ടിപ്പടുക്കാനും പ്രാദേശിക ഉത്പന്നങ്ങളെ പ്രോത്സാഹിപ്പിക്കാനും ജനങ്ങള്‍ പ്രതിജ്ഞാബദ്ധമാണെന്ന് നരേന്ദ്ര മോദി പറഞ്ഞു. അവശ്യവസ്തുക്കളുടെയും ഉത്പന്നങ്ങളുടെയും ഇറക്കുമതി കുറച്ച് ഇന്ത്യ സ്വയംപര്യാപ്തമാകേണ്ടതിൻ്റെ ആവശ്യകത പ്രധാനമന്ത്രി ഊന്നിപ്പറഞ്ഞു.

മുൻപ് പിപിഇ കിറ്റുകള്‍ രാജ്യത്ത് ഉത്പാദിപ്പിച്ചിരുന്നില്ലെങ്കിൽ കൊവിഡ് പ്രതിസന്ധിയുടെ കാലത്ത് വെൻ്റിലേറ്ററുകളുടെയും പിപിഇ കിറ്റുകളുടെയും ആവശ്യം വര്‍ധിച്ചതോടെ ഇന്ത്യ അവ വൻതോതിൽ ഉത്പാദിപ്പിച്ചു തുടങ്ങിയതായി പ്രധാനമന്ത്രി പറഞ്ഞു. ഇന്ത്യ ഇപ്പോള്‍ ഈ ഉപകരണങ്ങള്‍ കയറ്റുമതി ചെയ്യുന്നുണ്ടെന്നും ഇങ്ങനെയാണ് സ്വയംപര്യാപ്ത ഭാരതം ഉണ്ടാകുന്നതെന്നും പ്രധാനമന്ത്രി കൂട്ടിച്ചേര്‍ത്തു. നിരവധി കമ്പനികളാണ് ഇന്ത്യയിൽ ഉത്പാദനം തുടങ്ങാനായി എത്തുന്നത്. കഴിഞ്ഞ വര്‍ഷം മാത്രം 18 ശതമാനത്തോളം വിദേശനിക്ഷേപം വര്‍ധിപ്പിച്ചു. മെയ്ക്ക് ഇൻ ഇന്ത്യ എന്നതിനൊപ്പം ലോകത്തിനു വേണ്ടി നിര്‍മിക്കുക എന്നതു കൂടി നമ്മുടെ മന്ത്രമാകമമെന്ന് പ്രധാനമന്ത്രി പറഞ്ഞു.

Also Read: കൊവിഡ് വാക്‌സിന്‍ രാജ്യത്ത് എല്ലാവരിലേയ്ക്കും എത്തുമെന്ന് ഉറപ്പു തരുന്നു: പ്രധാനമന്ത്രി

ആത്മനിര്‍ഭര്‍ ഭാരത് പദ്ധതി രാജ്യത്തെ തൊഴിൽ മേഖലയ്ക്ക് സഹായകമാകുമെന്ന് പ്രധാനമന്ത്രി പറഞ്ഞു. പണം കടം വാങ്ങാതെ സമ്പാദിച്ചു തുടങ്ങാൻ ഇത് ഗ്രാമങ്ങളിലെ ജനങ്ങളെ സഹായിക്കും. "ലോകം ഒരു കുടുംബമാണെന്നാണ് ഇന്ത്യ എന്നും വിശ്വസിച്ചിട്ടുള്ളത്. നാം സാമ്പത്തിക വളര്‍ച്ചയിലും വികസനത്തിലും ശ്രദ്ധ കേന്ദ്രീകരിക്കുമ്പോള്‍ നമ്മുടെ യാത്രയിൽ മാനവികതയ്ക്ക് കേന്ദ്രസ്ഥാനം നല്‍കണം." പ്രധാനമന്ത്രി പറഞ്ഞു. "ഇന്ത്യ ഈ സ്വപ്നം യാഥാര്‍ഥ്യമാക്കുമെന്ന് എനിക്ക് ഉറപ്പുണ്ട്. ഒരിക്കൽ നാം എന്തെങ്കിലും ചെയ്യാൻ തീരുാനിച്ചാൽ ആ ലക്ഷ്യം പൂര്‍ത്തിയാക്കുന്നതു വരെ വിശ്രമമില്ല." കൊവിഡ് കാലത്ത് സ്വയംപര്യാപ്ത ഭാരതം കെട്ടിപ്പടുക്കാൻ 130 കോടി ജനങ്ങള്‍ പ്രതിജ്ഞ ചെയ്തെന്നും പ്രധാനമന്ത്രി പറഞ്ഞു.

Also Read: "സ്വയംപര്യാപ്തമാകണം ഇന്ത്യ"; ആരോഗ്യ, അടിസ്ഥാനസൗകര്യ മേഖലയിൽ വൻ പദ്ധതികൾ

സ്വയം പര്യാപ്ത ഭാരതം പ്രോത്സാഹിപ്പിക്കാനായി നൂറിലധികം പ്രതിരോധ ഉത്പന്നങ്ങളുടെ ഇറക്കുമതി അവസാനിപ്പിച്ചതായി പ്രധാനമന്ത്രി പറഞ്ഞു. ബഹിരാകാശ മേഖലയിൽ സ്വകാര്യമേഖലയ്ക്കു കൂടി അനുമതി കൊടുക്കുന്നതോടെ കൂടുതൽ തൊഴിലവസരങ്ങള്‍ സൃഷ്ടിക്കപ്പെടുമെന്നും രാജ്യത്തെ യുവാക്കള്‍ക്ക് ഗുണം ചെയ്യുമെന്നും പ്രധാനമന്ത്രി പറഞ്ഞു.