പ്രധാന മന്ത്രി നരേന്ദ്ര മോദി ഏപ്രിൽ 14ന് രാജ്യത്തെ അഭിസംബോധന ചെയ്യും

ന്യൂഡല്‍ഹി : പ്രധാനമന്ത്രി നരേന്ദ്ര മോദി ഏപ്രില്‍ 14ന് രാവിലെ പത്ത് മണിക്ക് രാജ്യത്തെ അഭിസംബോധന ചെയ്യും. ലോക്ക് ഡൗണ്‍ നിയന്ത്രണങ്ങള്‍ അവസാനിക്കുന്ന ദിവസമാണ് ഏപ്രില്‍ 14. പലസംസ്ഥാനങ്ങളും രണ്ടാം ഘട്ട ലോക്ക് ഡൗണ്‍ ആവശ്യപ്പെട്ടതിന് ശേഷം, രണ്ട് ആഴ്‍ച്ച കൂടെ ലോക്ക് ഡൗണ്‍ നീട്ടാനുള്ള തയാറെടുപ്പിലായിരുന്നു കേന്ദ്ര സര്‍ക്കാര്‍. ഇക്കാര്യത്തില്‍ ഔദ്യോഗികമായ പ്രഖ്യാപനം നാളെ ഉണ്ടാകും.


ഔദ്യോഗിക ട്വിറ്റര്‍ ഹാന്‍ഡിലിലൂടെയാണ് മോദി രാജ്യത്തെ അഭിസംബോധന ചെയ്യുന്ന കാര്യം അറിയിച്ചത്. നേരത്തെ മാര്‍ച്ച് അവസാനം പ്രഖ്യാപിച്ച മൂന്നാഴ്ച്ച ലോക്ക് ഡൗണും സമാനമായാണ് മോദി പ്രഖ്യാപിച്ചത്.

Also Read: കൊവിഡ് കേസുകള്‍ ഇന്ത്യയില്‍ 9000 കവിഞ്ഞു

ലോക്ക് ഡൗണ്‍ തുടരേണ്ട സാഹചര്യമാണ് രാജ്യത്ത് ഉള്ളതെന്നാണ് മുഖ്യമന്ത്രിമാരുമായി നരേന്ദ്ര മോദി കഴിഞ്ഞ ദിവസം നടത്തിയ കൂടിക്കാഴ്‍ച്ചയില്‍ വ്യക്തമായത്. ഇത് പരിഗണിച്ച് കേന്ദ്രം നിലപാട് എടുക്കുമെന്നാണ് കരുതുന്നത്. അതേസമയം മഹാരാഷ്ട്ര, ഒഡീഷ സംസ്ഥാനങ്ങള്‍ സ്വന്തം നിലയ്ക്ക് തന്നെ ഏപ്രില്‍ 30വരെ ലോക്ക് ഡൗണ്‍ നീട്ടിയിട്ടുണ്ട്.

Also Read: കൊറോണയുടെ രണ്ടാം വ്യാപനം ഉണ്ടാകുമോ; നിങ്ങളറിയേണ്ടത്?

കൊറോണ നിയന്ത്രണങ്ങളുടെ ഭാഗമായി മാര്‍ച്ച് അവസാനമാണ് ഇന്ത്യ ലോക്ക് ഡൗണ്‍ പ്രഖ്യാപിച്ചത്. ലോകത്തിലെ തന്നെ ഏറ്റവും വലിയ അടച്ചിടല്‍ ആയിരുന്നു ഇത്. രാജ്യത്തെ മൂന്ന് സോണുകളായി തിരിച്ച് നിയന്ത്രണങ്ങള്‍ നീട്ടണമെന്നാണ് നിലവിലെ ആവശ്യം. കേരളം പൂര്‍ണമായും അടച്ചിടലിനെ അനുകൂലിക്കുന്നില്ല. ഹോട്ട്‍സ്പോട്ടുകള്‍ മാത്രം നിയന്ത്രണങ്ങള്‍ കര്‍ശനമാക്കി ബാക്കിയുള്ള സ്ഥലങ്ങളില്‍ ഇളവ് വേണമെന്നാണ് കേരളം ആവശ്യപ്പെടുന്നത്.

ഇതുവരെ ഇന്ത്യയില്‍ 9000 പേര്‍ക്ക് കൊറോണ വൈറസ് സ്ഥിരീകരിച്ചിട്ടുണ്ട്. മരണസംഖ്യ 300 കടന്നു.