മഹാമാരിയും തീവ്രവാദവും: യുഎൻ പൊതുസഭയെ അഭിസംബോധന ചെയ്യാൻ പ്രധാനമന്ത്രി മോദി

ന്യൂയോര്‍ക്ക്: പ്രധാനമന്ത്രി നരേന്ദ്ര മോദി ശനിയാഴ്ച ഐക്യരാഷ്ട്ര സംഘടനയുടെ പൊതുസഭയെ അഭിസംബോധന ചെയ്യും. 75-ാമത് യുഎൻ പൊതുസഭയുടെ പൊതുചര്‍ച്ചയിലായിരിക്കും പ്രധാനമന്ത്രി മോദിയുടെ പ്രസംഗം. ഉച്ചയ്ക്കു മുൻപു നടക്കുന്ന സെഷനിലെ ആദ്യ പ്രാസംഗികനായിരിക്കും പ്രധാനമന്ത്രി നരേന്ദ്ര മോദി.

Also Read: യുഎസിലെ പ്രവാസികൾക്ക് 'താത്പര്യം ട്രംപിനെ'; കാരണം മോദിയെന്ന് സർവേ ഫലം

കൊവിഡ് 19 സാഹചര്യത്തിൽ വിര്‍ച്വൽ രീതിയിലാണ് ഈ വര്‍ഷം പൊതുസഭ ചേരുന്നത്. ന്യൂയോര്‍ക്കിലെ യുഎൻജിഎ ഹാളിൽ പ്രധാനമന്ത്രി മോദിയുടെ റെക്കോഡ് ചെയ്ത പ്രസംഗമാണ് പ്രദര്‍ശിപ്പിക്കുക. 'നമുക്ക് വേണ്ട ഭാവി, നമുക്ക് ആവശ്യമായ ഐക്യരാഷ്ട്ര സംഘടന, ബഹുസ്വരതയോടുള്ള ഒത്തൊരുമിച്ചുള്ള കടപ്പാട് - ഒത്തുചേര്‍ന്നുള്ള നടപടികളിലൂടെ കൊവിഡ് 19നെ നേരിടാം' എന്നതാണ് ഇത്തവണത്തെ യുഎൻ പൊതുസഭയുടെ തീം.

Also Read: ലൈഫ് മിഷൻ ഇടപാട്: സിബിഐ നടപടി രാഷ്ട്രീയ പ്രേരിതമെന്ന് സിപിഎം

ഇന്ത്യ ഊന്നൽ കൊടുക്കുന്ന മേഖലകളായിരിക്കും പ്രധാനമന്ത്രി തന്‍റെ പ്രസംഗത്തിൽ പരാമര്‍ശിക്കുക എന്ന് വാര്‍ത്താ ഏജൻസിയായ എഎൻഐ റിപ്പോര്‍ട്ട് ചെയ്യുന്നു. അന്താരാഷ്ട്രതലത്തിൽ തീവ്രവാദ വിരുദ്ധ പ്രവര്‍ത്തനങ്ങളാണ് ഇന്ത്യ യുഎന്നിൽ ഊന്നൽ കൊടുക്കുന്നതെന്നാണ് നിരീക്ഷകര്‍ അഭിപ്രായപ്പെടുന്നത്. ഈ സാഹചര്യത്തിൽ കൂടുതൽ സംഘടനകളെ നിരോധിത പട്ടികയിൽ ഉള്‍പ്പെടുത്താനും നീക്കം ചെയ്യാനും ഇന്ത്യ സമ്മര്‍ദ്ദം ചെലുത്തുമെന്ന് ഏജൻസി റിപ്പോര്‍ട്ടിൽ പറയുന്നു. മഹാമാരിയുടെ സാഹചര്യത്തിൽ 150ലധികം രാജ്യങ്ങള്‍ക്കു വേണ്ടി 'ആഗോള ഫാര്‍മസി'യായി പ്രവര്‍ത്തിക്കുന്ന ഇന്ത്യയുടെ സ്ഥാനത്തെപ്പറ്റി പ്രധാനമന്ത്രി പരാമര്‍ശിച്ചേക്കും. നാലാം ലോക വനിതാ കോൺഫറൻസിൻ്റെ 25-ാം വാര്‍ഷികത്തിൽ സ്ത്രീ കേന്ദ്രീകൃത വികസനത്തെപ്പറ്റിയും മോദി സംസാരിക്കുമെന്നാണ് റിപ്പോര്‍ട്ട്.