മോദിയുടെ എംപി ഓഫീസ് ഒഎൽഎക്‌സിൽ വിൽപ്പനയ്‌ക്ക്; വിലയും പുറത്തുവിട്ടു, നാല് പേർ അറസ്‌റ്റിൽ

വാരണാസി: ഉത്തർപ്രദേശിലെ വാരണാസിയിൽ സ്ഥിതി ചെയ്യുന്ന പ്രധാനമന്ത്രി നരേന്ദ്ര മോദിയുടെ എംപി ഓഫീസ് വിൽക്കുന്നുവെന്ന പരസ്യത്തിൽ പോലീസ് അന്വേഷണം. സാധനങ്ങൾ വിൽക്കാനും വാങ്ങാനും കഴിയുന്ന ഓൺലൈൻ വിപണിയായ ഒഎൽഎക്‌സിലാണ് ഓഫീസിൻ്റെ ചിത്രവും വിലയുമടക്കമുള്ള പരസ്യം പ്രത്യക്ഷപ്പെട്ടത്.

Also Read: കര്‍ഷകരുടെ ജീവിതം നന്നായാല്‍ മതി, എനിക്ക് ക്രെഡിറ്റ് വേണ്ട; കൈകൂപ്പി നരേന്ദ്ര മോദി

ലക്ഷമികാന്ത് ഓജ എന്നയാളുടെ ഐഡിയിൽ നിന്നാണ് ഒഎൽഎക്‌സിൽ പരസ്യം പോസ്‌റ്റ് ചെയ്‌തിരിക്കുന്നത്. 6500 സ്ക്വയർ ഫീറ്റ് കെട്ടിടം ഏഴ് കോടി അമ്പത് ലക്ഷം രൂപയ്‌ക്ക് വിൽപ്പനയ്‌ക്ക് എന്നാണ് പരസ്യം. പരാതി ലഭിച്ചതിനെ തുടർന്ന് പോലീസ് നടത്തിയ ആന്വേഷണത്തിൽ പരസ്യം വ്യാജമാണെന്ന് വ്യക്തമായി.

പ്രധാനമന്ത്രിയുടെ എംപി ഓഫീസുമായി ബന്ധപ്പെട്ടുള്ളത് വ്യാജ പരസ്യമാണെന്ന് വാരണാസി എസ്എസ്‌പി അമിത് കുമാർ പതക് വ്യക്തമാക്കി. ഒഎൽഎക്‌സിൽ നിന്ന് പരസ്യം നീക്കം ചെയ്‌തു. സംഭവത്തിൽ അന്വേഷണം ആരംഭിച്ചു. നാല് പേരുടെ അറസ്‌റ്റ് രേഖപ്പെടുത്തിയിട്ടുണ്ട്. ഓഫീസിൻ്റെ ഫോട്ടോ പകർത്തിയ വ്യക്തിയുൾപ്പെടെയുള്ളവരാണ് ആറസ്‌റ്റിലായതെന്നും അദ്ദേഹം പറഞ്ഞു.

Also Read: കോടതിയെ അപമാനിച്ചോ? കുനാല്‍ കംറ മറുപടി പറയണം; ആറ് ആഴ്‍ച്ച നല്‍കി സുപ്രീംകോടതി

അറസ്‌റ്റിലായവരുടെ പേരുവിവരങ്ങൾ പോലീസ് പുറത്ത് വിട്ടിട്ടില്ല. ഇവരുടെ ലക്ഷ്യം എന്തായിരുന്നുവെന്നും വ്യക്തമായിട്ടില്ല. വാരണാസിയിലെ ഗുരുദാം കോളനിയിലാണ് പ്രധാനമന്ത്രി നരേന്ദ്ര മോദിയുടെ എംപി ഓഫീസ് സ്ഥിതി ചെയ്യുന്നത്.