സാമ്പത്തിക മാന്ദ്യം: സര്‍ക്കാരിനെതിരെ രൂക്ഷവിമര്‍ശനവുമായി പ്രിയങ്ക ഗാന്ധി

ന്യൂഡല്‍ഹി: രാജ്യം ഇപ്പോള്‍ നേരിടുന്ന സാമ്പത്തിക പ്രതിസന്ധി ചരിത്രത്തിലില്ലാത്തത്ര മോശം അവസ്ഥയാണെന്ന് കോണ്‍ഗ്രസ് ജനറല്‍ സെക്രട്ടറി പ്രിയങ്ക ഗാന്ധി. സാമ്പത്തിക മാന്ദ്യത്തിന്‍റെ തീവ്രത ബി.ജെ.പി. അംഗീകരിക്കണമെന്നും പ്രിയങ്ക ട്വീറ്റ് ചെയ്തു.

സാമ്പത്തിക മാന്ദ്യത്തിന്‍റെ കാര്യത്തില്‍ നരേന്ദ്ര മോദി സര്‍ക്കാരിനെതിരെ രൂക്ഷവിമര്‍ശനമാണ് പ്രിയങ്ക ഉന്നയിച്ചത്. ഒരു നുണ നൂറുതവണ ആവര്‍ത്തിച്ചാല്‍ അത് സത്യമാവില്ല. രാജ്യം ഇപ്പോള്‍ നേരിടുന്ന പ്രതിസന്ധിയുടെ ഗൗരവം മനസ്സിലാക്കി ബി.ജെ.പി. സര്‍ക്കാര്‍ പരിഹാരമാര്‍ഗങ്ങള്‍ തേടണം.-പ്രിയങ്ക പറഞ്ഞു.

മാന്ദ്യം എല്ലാ മേഖലകളിലും പ്രകടമാണെന്നും എത്ര കാലം സര്‍ക്കാര്‍ ഇത്തരത്തില്‍ പിടിച്ചുനില്‍ക്കുമെന്നും പ്രിയങ്ക ചോദിച്ചു.

സാമ്പത്തിക പ്രതിന്ധിയുടെ കാര്യത്തില്‍ ഇതാദ്യമല്ല പ്രിയങ്ക ബി.ജെ.പി. സര്‍ക്കാരിനെതിരെ രംഗത്തെത്തുന്നത്. പലപ്പോഴും ശക്തമായ ഭാഷയിലാണ് പ്രിയങ്ക ഗാന്ധി മോദി സര്‍ക്കാരിനെതിരെ വിമര്‍ശനങ്ങളുന്നയിക്കുന്നത്.