ഇന്ത്യ ഈ പതാക നിരോധിക്കണോ?

ന്യൂഡല്‍ഹി: പാകിസ്ഥാന്‍ രാഷ്ട്രീയ പാര്‍ട്ടി മുസ്ലീം ലീഗിന്‍റെ പതാകയ്ക്ക് സമാനമായ പതാക ഇന്ത്യയിലെ മുസ്ലീം മതസ്ഥാപനങ്ങളില്‍ ഉയര്‍ത്തുന്നത് നിരോധിക്കണമെന്ന് സുപ്രീം കോടതിയില്‍ ഹര്‍ജി. ഷിയ വഖഫ് ബോര്‍ഡ്‍ ചെയര്‍മാന്‍ ആണ് പച്ച നിറത്തിലെ പശ്ചാത്തലത്തില്‍ ചന്ദ്രക്കലയും നക്ഷത്രവുമുള്ള പതാക നിരോധിക്കണമെന്ന ആവശ്യവുമായി കോടതിയില്‍ എത്തിയത്.

പതാക മതപരമല്ലെന്നാണ് ഹര്‍ജിക്കാരന്‍റെ വാദം. ഒരു ഇസ്ലാമിക രീതികളുടെയും ഭാഗമല്ല കൊടി. പാകിസ്ഥാനില്‍ നിന്നുള്ള കൊടിയാണിത്. ഇത് ഉയര്‍ത്താന്‍ അനുവദിക്കരുത് - ഹര്‍ജിയില്‍ പറയുന്നു.
ചന്ദ്രക്കലയുടെ അഗ്രഭാഗങ്ങള്‍ വലത് വശത്തേക്ക് തിരിഞ്ഞിരിക്കുന്ന രീതിയിലുള്ളതാണ് ഈ പതാക.

പാകിസ്ഥാന് മുന്‍പേ നിലവിലുള്ള പതാകയാണ് സത്യത്തില്‍ ഇത്. ബൈസാന്‍റിയന്‍ സാമ്രാജ്യത്തില്‍ ഇത് ഉപയോഗിച്ചിരുന്നു. ഓട്ടോമന്‍ സാമ്രാജ്യം ഇത് സ്വീകരിച്ചതിന് ശേഷമാണ് പതാക വ്യാപകമായി ഇസ്ലാമില്‍ ഉപയോഗിക്കപ്പെട്ടത്.

സഫ്‍വെയ്‍ദ്‍ സാമ്രാജ്യമായിരുന്നു ഒട്ടോമനുകളെ എതിര്‍ത്തിരുന്ന പക്ഷം. ഷിയ സംസ്‍കാരമായിരുന്നു ഇവര്‍ക്ക്. നിലവില്‍ ഇറാനിലുള്ള ഭൂരിപക്ഷ മുസ്ലീമുകളുടെ വിശ്വാസധാരയാണിത്.

നിലവിലെ നിയമങ്ങള്‍ അനുസരിച്ച് ഈ പതാക പ്രദര്‍ശിപ്പിക്കുന്നതുകൊണ്ട് മാത്രം ആരെയും കുറ്റക്കാരായി കണക്കാക്കില്ല. നിരോധിത സംഘടനകളോടോ ഐക്യപ്പെട്ടോ നീതിനിര്‍വഹണത്തിന് തടസമായോ പതാക ഉപയോഗിച്ചെന്നു കണ്ടാല്‍ നടപടി ഉണ്ടായേക്കാം.

ഉദാഹരണത്തിന് 2014ല്‍ കശ്‍മീരിലെ ശ്രീനഗറില്‍ ഇസ്ലാമിക് സ്റ്റേറ്റ് തീവ്രവാദ സംഘടനയുടെ പതാക ചിലര്‍ ഉയര്‍ത്തി. നിയമവിരുദ്ധ പ്രവര്‍ത്തനങ്ങള്‍ തടയുന്ന 1967ലെ നിയമത്തിന്‍റെ 13-ാം വകുപ്പ് അനുസരിച്ച് ഇവര്‍ക്ക് എതിരെ എഫ്‍.ഐ.ആര്‍ രജിസ്റ്റര്‍ ചെയ്‍തിരുന്നു.