അഴിമതി പുറത്തുകൊണ്ടുവന്നയാളുടെ സുരക്ഷക്ക് ചമ്പല്‍ കൊള്ളക്കാര്‍

ഭോപ്പാല്‍: വ്യാപം അഴിമതി പുറത്തുകൊണ്ടുവരുന്നതില്‍ നിര്‍ണായക പങ്കുവഹിച്ച ആശിഷ് ചതുര്‍വേദി തന്‍റെ സുരക്ഷക്കായി പഴയകാല ചമ്പല്‍ കൊള്ളക്കാരുടെ സഹായം തേടി. മധ്യപ്രദേശ് പോലീസ് നല്‍കുന്ന സുരക്ഷ അപര്യാപ്‍തമെന്ന് തോന്നിയതോടെയാണ് ആശിഷ് കൊള്ളക്കാരുടെ സഹായം തേടിയത്.

എണ്‍പതുകളില്‍ ചമ്പലില്‍ ഭീതി വിതച്ച മല്‍ഖാന്‍ സിങ്ങിനെയാണ് ഇതിനായി ആശിഷ് സമീപിച്ചിരിക്കുന്നത്. സംസ്ഥാന സര്‍ക്കാര്‍ ആയുധവും പോലീസുകാര്‍ക്കു നല്‍കുന്നതിന്‍റെ പകുതി തുകയും തന്നാല്‍ ആശിഷിന്‍റെ സുരക്ഷാ ചുമതല ഏറ്റെടുക്കാമെന്നാണ് മല്‍ഖാന്‍ സിങ്ങിന്‍റെ നിലപാട്. തട്ടിക്കൊണ്ടുപോകലും കൊലപാതകവും ഉള്‍പ്പെടെ നൂറോളം കേസുകളാണ് 70 നോടടുത്ത് പ്രായമുള്ള സിങ്ങിന്‍റെ പേരില്‍ ഉള്ളത്.

തനിക്ക് മുഴുവന്‍ സമയവും ആശിഷിന്‍റെ കൂടെ ചിലവഴിക്കാന്‍ കഴിയില്ലെങ്കിലും തന്നെപ്പോലെ പോലീസിനു കീഴടങ്ങിയ പഴയകാല കൊള്ളക്കാര്‍ എല്ലാവരും ചേര്‍ന്ന് അദ്ദേഹത്തിന് സുരക്ഷ നല്‍കുമെന്ന് സിങ് പറഞ്ഞു. എന്നാല്‍ ഇതിനുള്ള സഹായം സര്‍ക്കാര്‍ നല്‍കണം.

രാജ്യത്തെയാകെ ഞെട്ടിച്ച വ്യാപം അഴിമതി പുറത്തുകൊണ്ടുവന്ന നാലുപേരില്‍ ഒരാളാണ് 27 കാരനായ ആശിഷ് ചതുര്‍വേദി എന്ന സാമൂഹ്യപ്രവര്‍ത്തകന്‍. ഇതിനകം മൂന്നു തവണ ഇദ്ദേഹത്തിനു നേരെ വധശ്രമം നടന്നിട്ടുണ്ട്. 14 തവണ ഭീഷണിയും ലഭിച്ചു.

Protect me, Vyapam whistleblower tells Chambal ex-dacoits

Vyapam whistleblower Ashish Chaturvedi has sought help from former dacoit Malkhan Singh, who struck terror in the heart of the Chambal ravines in the 1980s