പരസ്പരം കാലില്‍ വീണ് ഡിഎസ്പിയും പ്രതിഷേധക്കാരും; അമരാവതിയില്‍ പ്രതിഷേധം ശക്തമാകുന്നു

അമരാവതി: ഡിഎസ്പിയുടെ കാലില്‍ വീണ് പ്രതിഷേധക്കാര്‍, പ്രതിഷേധക്കാരുടെ കാലില്‍ വീണ് ഡിഎസ്പി. മറ്റെവിടെയുമല്ല, സംസ്ഥാന തലസ്ഥാനവുമായി ബന്ധപ്പെട്ട് ആന്ധ്രാപ്രദേശിലെ കര്‍ഷകര്‍ നടത്തുന്ന പ്രതിഷേധത്തിനിടെയാണ് വേറിട്ട ഈ സംഭവം. എന്നാല്‍, ആന്ധ്രാപ്രദേശിലെ കര്‍ഷകരുടെ പ്രതിഷേധം ശക്തമാകുകയാണ്.

ഡെപ്യൂട്ടി പോലീസ് കമ്മീഷണര്‍ വീരറെഡ്ഡിയുടെ കാലില്‍ പ്രതിഷേധക്കാര്‍ വീഴുന്നതും ഡിഎസ്പി തിരിച്ച് പ്രതിഷേധക്കാരുടെ കാലിലും വീഴുന്നതായി വീഡിയോയില്‍ കാണാം. ഇതിനിടെ ഡിസിപിയെ തടയാന്‍ ശ്രമിച്ച ഉദ്യോഗസ്ഥനെ അദ്ദേഹം ശാസിക്കുന്നുമുണ്ട്.


ആന്ധ്രയ്ക്ക് മൂന്ന് തലസ്ഥാനം പണിയാനുള്ള ജഗന്‍ മോഹന്‍ റെഡ്ഡി സര്‍ക്കാരിന്റെ തീരുമാനത്തിന് എതിരെയാണ് കര്‍ഷകരുടെ പ്രതിഷേധം. സര്‍ക്കാരിന്റെ തീരുമാനം പിന്‍വലിക്കണമെന്ന് ആവശ്യപ്പെട്ട് അമരാവതി ജില്ലയിലെ മണ്ടഡത്തിലെ സമരം മൂന്നാഴ്ച പിന്നിട്ടു.

വിശാഖപട്ടണം, അമരാവതി, കര്‍ണൂല്‍ എന്നിവിടങ്ങളിലായി തലസ്ഥാനം നിര്‍മ്മിക്കാനാണ് സര്‍ക്കാരിന്റെ പദ്ധതി. എക്‌സിക്യൂട്ടീവ് ക്യാപിറ്റലായി വിശാഖപട്ടണം, ലെജിസ്ലേറ്റീവ് തലസ്ഥാനമായി അമരാവതി, ജുഡീഷ്യല്‍ തലസ്ഥാനമായി കര്‍ണൂര്‍ എന്നിങ്ങനെയാണ് സര്‍ക്കാര്‍ പുറത്തുവിട്ടിരിക്കുന്നത്. എന്നാല്‍, സര്‍ക്കാരിന്റെ ഈ നീക്കത്തിനെതിരെ അമരാവതിയില്‍ തലസ്ഥാനം നിര്‍മ്മിക്കാനായി 33,000 ഏക്കര്‍ കൃഷിഭൂമി വിട്ടുനല്‍കിയാണ് പ്രക്ഷോഭകര്‍ സമരത്തിനിറങ്ങിയത്.