പ്രതിഷേധം 'പൂക്കുന്നു': പോലീസിന് ചുവന്ന പനിനീര്‍പ്പൂക്കള്‍; പ്രക്ഷോഭത്തിന് പുതിയ മുഖം

പൗരത്വ നിയമത്തിനെതിരെയുള്ള പ്രതിഷേധം പലയിടങ്ങളിലും സംഘർഷത്തിലേക്ക് വഴിമാറിയപ്പോൾ പോലീസുകാരന് പൂ സമ്മാനിക്കുന്ന യുവതിയുടെ ചിത്രം വൈറലായി. “ഞാൻ ചരിത്രം പഠിക്കുകയാണെന്ന് എന്റെ അച്ഛൻ കരുതുന്നു. എന്നാൽ ഞാൻ ചരിത്രം നിർമ്മിക്കുന്നതിന്റെ തിരക്കിലാണെന്ന് അച്ഛൻ അറിയുന്നില്ലല്ലോ,” എന്നാണ് പെൺകുട്ടിയുടെ കയ്യിലുണ്ടായിരുന്ന പ്ലക്കാഡിൽ എഴുതിയിരുന്നത്.

“ഞങ്ങൾക്കൊപ്പം വരൂ. ഞങ്ങൾ യുവാക്കൾക്ക് സംസാരിക്കാനുണ്ട്. ഡൽഹി പോലീസ് ലാത്തികൊണ്ട് ഉപദ്രവിക്കരുത്,” എന്നുള്ള മുദ്രാവാക്യം ഉയർത്തി പോലീസുകാർക്കുനേരെ പൂക്കൾ നീട്ടിക്കൊണ്ടായിരുന്നു വ്യാഴാഴ്ച വിദ്യാർഥികൾ പ്രതിഷേധിച്ചത്.

പ്രതിഷേധത്തിനിടെ ദേശീയ ഗാനം പാടിയ പ്രതിഷേധക്കാർ പോലീസുകാരോട് തങ്ങൾക്കൊപ്പം ചേർന്ന് പാടാൻ ആവശ്യപ്പെട്ടു. കൂടാതെ “ഞങ്ങൾ ചെറുപ്പക്കാരാണ്, ഞങ്ങൾക്ക് സംസാരിക്കണം, ഞങ്ങൾ ഇവിടെയെത്തിയത് തൊഴിക്കാനോ ഇടിക്കാനോ അല്ല,” എന്നു പോകുന്നു പ്രതിഷേധ ഗാനത്തിലെ വരികൾ