രാഹുൽ സഞ്ചരിച്ച വിമാനത്തിൽ സാങ്കേതിക തകരാർ

ന്യൂഡൽഹി: കോൺഗ്രസ് അധ്യക്ഷൻ രാഹുൽ ഗാന്ധി ഡൽഹിയിൽനിന്ന് തിരഞ്ഞെടുപ്പു പ്രചാരണത്തിനായി കർണാടകയിലേക്കു പോയ വിമാനത്തിൽ സാങ്കേതിക തകരാർ. രാവിലെ 9.20 ഓടെ ഡൽഹിയിൽനിന്ന് തിരിച്ച വിമാനത്തിൽ 10.45 ഓടെയാണ് തകരാർ കണ്ടതെന്നു കോൺഗ്രസ് നൽകിയ പരാതിയിൽ പറയുന്നു.

പലതവണ കറങ്ങിയ വിമാനം ഒരു വേള ഇടത്തേക്കു വല്ലാതെ ഉലഞ്ഞതായും പിന്നീട് താഴേക്കു ചരിഞ്ഞതായും ഡയറക്ടർ ജനറൽ ഓഫ് സിവിൽ എവിയേഷനു (ഡിജിസിഎ) നൽകിയ പരാതിയിൽ കോൺഗ്രസ് വ്യക്തമാക്കി. ‘വിടി–എവിഎച്ച്’ കോഡിലെ ചാർട്ടേർഡ് വിമാനം ഹൂബ്ലി വിമാനത്താവളത്തിൽ ഇറങ്ങുന്നതിനിടെ റൺവേയിൽ തെന്നിയതായും റിപ്പോർട്ടുണ്ട്.

സംഭവത്തിന്റെ കൂടുതൽ വിശദാംശങ്ങൾക്കായി സുരക്ഷാ സൈനികർ ക്യാബിൻ ക്യൂവിനെയും രണ്ടു പൈലറ്റുമാരെയും കസ്റ്റഡിയിലെടുത്തു ചോദ്യം ചെയ്തു. പൈലറ്റുമാർക്കെതിരെ ഗോകുൽ റോഡ് പൊലീസ് സ്റ്റേഷനിൽ എഫ്ഐആർ സമർപ്പിച്ചതായും റിപ്പോർട്ടുണ്ട്.