രാഹുല്‍ ഗാന്ധി രാജ്യത്തെ ഏറ്റവും വലിയ കോമാളിയെന്ന് കെസിആര്‍

ഹൈദരാബാദ്: രാഹുല്‍ ഗാന്ധിക്കെതിരെ ശക്തമായി ആഞ്ഞടിച്ച് തെലങ്കാന മുഖ്യമന്ത്രി കെ.ചന്ദ്രശേഖര റാവു. രാജ്യത്തെ ഏറ്റവും വലിയ കോമാളിയാണ് രാഹുല്‍ ഗാന്ധിയെന്നായിരുന്നു കെസിആറിന്‍റെ പരാമര്‍ശം. ഇന്നു നടന്ന മന്ത്രിസഭാ യോഗത്തിനുശേഷം മാധ്യമ പ്രവര്‍ത്തകരോട് സംസാരിക്കവെയാണ് രാഹുല്‍ ഗാന്ധിക്കെതിരെ ആഞ്ഞടിച്ചത്.

രാഹുല്‍ ഗാന്ധിയെക്കുറിച്ച് എല്ലാവര്‍ക്കുമറിയാം. രാജ്യത്തെ ഏറ്റവും വലിയ കോമാളിയാണ് അദ്ദേഹം. നരേന്ദ്രമോദിയെ ഏതു രീതിയിലാണ് ആലിംഗനം ചെയ്തതെന്ന് രാജ്യം കണ്ടതാണെന്നും കെസിആര്‍ പറഞ്ഞു.

രാഹുല്‍ തെലങ്കാനയില്‍ എത്രമാത്രം തിരഞ്ഞെടുപ്പ് പരിപാടികള്‍ നടത്തുന്നോ അത്രമാത്രം സീറ്റുകള്‍ ടിആര്‍എസിനു കൂടുമെന്ന് മാധ്യമ പ്രവര്‍ത്തകരുടെ ചോദ്യത്തിനു ഉത്തരം നല്‍കി.

എല്ലാ പാരമ്പര്യവും അനന്തരാവകാശമായി ലഭിച്ചയാളാണ് രാഹുല്‍ ഗാന്ധിയെന്ന് ചന്ദ്രശേഖര റാവു പറഞ്ഞു. ഡല്‍ഹിയുടെ അടിമയാകരുതെന്നാണ് തനിക്ക് തെലങ്കാനയിലെ ജനങ്ങളോട് പറയാനുള്ളതെന്നും തെലങ്കാനയുടെ തീരുമാനങ്ങള്‍ ഇവിടെ തന്നെ തീരുമാനിക്കണമെന്നും അദ്ദേഹം പറഞ്ഞു.

ടിആര്‍എസിന്‍റെ 100 സ്ഥാനാര്‍ത്ഥികളുടെ പേരും മുഖ്യമന്ത്രി പ്രഖ്യാപിച്ചു. തിരഞ്ഞെടുപ്പ് പ്രചാരണ പരിപാടികള്‍ നാളെ ആരംഭിക്കുമെന്നും മുഖ്യമന്ത്രി കൂട്ടിച്ചേര്‍ത്തു.