ഇന്ത്യക്ക് വേണ്ടത് യുവാക്കളെക്കുറിച്ചുള്ള മണ്ടന്‍ സിദ്ധാന്തങ്ങളല്ല; നിര്‍മല സീതാരാമെനെതിര രാഹുല്‍ ഗാന്ധി

ന്യൂഡല്‍ഹി: രാജ്യം നേരിടുന്ന സാമ്പത്തിക പ്രതിസന്ധിയില്‍ ധനമന്ത്രി നിര്‍മല സീതാരാമന്‍റെ നിലപാടുകള്‍ക്കെതിരെ പൊട്ടിത്തെറിച്ച് മുന്‍ കോണ്‍ഗ്രസ് അധ്യക്ഷന്‍ രാഹുല്‍ ഗാന്ധി.

യുവാക്കളെക്കുറിച്ചുള്ള മണ്ടന്‍ സിദ്ധാന്തങ്ങളും കെട്ടിച്ചമച്ച വാര്‍ത്തകളുമല്ല ഇന്ത്യക്ക് വേണ്ടതെന്നും സാമ്പത്തികരംഗത്തെ സ്ഥിരതയുള്ളതാക്കാന്‍ ശക്തമായ ആശയങ്ങളാണ് വേണ്ടതെന്നും രാഹുല്‍ ഗാന്ധി പറഞ്ഞു. പ്രശ്‍നമുണ്ടെന്ന് എന്ന് തിരിച്ചറിയുകയാണ് പരിഹാരത്തിലേക്കുള്ള മികച്ച തുടക്കമെന്നും രാഹുല്‍ പറഞ്ഞു.

ഇന്ത്യയുടെ ഇപ്പോഴത്തെ സാമ്പത്തിക സ്ഥിതി ഭയാനകമായ സ്ഥിതിയിലാണെന്ന് കോണ്‍ഗ്രസ് ഇടക്കാല പ്രസിഡന്‍റ് സോണിയാ ഗാന്ധി പറഞ്ഞു. നഷ്‍ടങ്ങള്‍ കൂടിക്കൊണ്ടിരിക്കുകയാണ്. സാമ്പത്തിക മാന്ദ്യത്തില്‍ നിന്ന ശ്രദ്ധ തിരിക്കാന്‍ അനാവശ്യമായ രാഷ്ട്രീയ വൈരാഗ്യത്തില്‍ മുഴുകുകയാണ് ബി.ജെ.പി.-സോണിയാ ഗാന്ധി പറഞ്ഞു.

ജനാധിപത്യം ആപത്തിലാണെന്നും ജനവധി ദുരുപയോഗപ്പെടുത്തുകയാണെന്നും പാര്‍ട്ടി നേതാക്കളുടെ യോഗത്തില്‍ സോണിയ പറഞ്ഞു. ഗാന്ധി, പട്ടേല്‍, അംബേദ്‍കര്‍ തുടങ്ങിയ നേതാക്കളെ ബി.ജെ.പി. അവരുടെ ഹീനമായ അജണ്ട നടപ്പാക്കാനായി ദുര്‍വ്യാഖ്യാനം ചെയ്യുകയാണെന്നും സോണിയ പറഞ്ഞു.

ഓട്ടോമൊബൈല്‍ വ്യവസായ രംഗത്തെ തകര്‍ച്ചയ്ക്ക് കാരണം യുവാക്കളുടെ മാനസികാവസ്ഥയിലുള്ള മാറ്റമാണെന്ന ധനമന്ത്രി നിര്‍മല സീതാരാമന്‍റെ പ്രസ്‍താവനയക്ക് പിന്നാലെയാണ് സോണിയ ഗാന്ധിയുടെയും രാഹുല്‍ ഗാന്ധിയുടെയും പ്രസ്‍താവനകള്‍ വന്നത്. യുവാക്കള്‍ ഊബറും ഒലയും പോലെയുള്ള ഓണ്‍ലൈന്‍ ടാക്സികള്‍ ഉപയോഗിക്കുകയും കാര്‍ വാങ്ങാതിരിക്കുകയും ചെയ്യുന്നതാണ് ഓട്ടോമൊബൈല്‍ രംഗത്തെ തകര്‍ച്ചയ്‍ക്ക് കാരണമെന്നായിരുന്നു നിര്‍മല സീതാരാമന്‍ പറഞ്ഞത്.

നിര്‍മല സീതാരാമന്‍റെ പ്രസ്‍താവനയ്‍ക്കെതിരെ ട്വിറ്ററിലും മറ്റും സമൂഹ മാധ്യമങ്ങളിലും വന്‍ പ്രതിഷേധമാണ് നടക്കുന്നത്. ബോയ്‍കോട്ട് മില്ലെനിയല്‍സ് (#BoycottMillennials), സേ ഇറ്റ് ലൈക് നിര്‍മല തായ് (#SayItLikeNirmalaTai) തുടങ്ങിയ ഹാഷ് ടാഗുകളിലാണ് യുവാക്കള്‍ പ്രതിഷേധ പോസ്റ്റുകളിടുന്നത്.