2019ൽ ബിജെപിയെ പരാജയപ്പെടുത്തുമെന്ന് രാഹുൽ ഗാന്ധി

ന്യൂഡൽഹി: രാജസ്ഥാനിലും മധ്യപ്രദേശിലും ഛത്തീസ്‍‍ഗഡിലും അധികാരത്തിൽ വരുന്ന കോൺഗ്രസ് സര്‍ക്കാരുകള്‍ യുവാക്കള്‍ക്കും കര്‍ഷകര്‍ക്കും വേണ്ടി പ്രവര്‍ത്തിക്കുമെന്ന് കോൺഗ്രസ് അധ്യക്ഷൻ രാഹുൽ ഗാന്ധി. തെരഞ്ഞെടുപ്പ് നടന്ന അഞ്ച് സംസ്ഥാനങ്ങളിലും കോൺഗ്രസിനു വേണ്ടി വോട്ട് ചെയ്ത ജനങ്ങള്‍ക്ക് രാഹുൽ ഗാന്ധി നന്ദി പറഞ്ഞു.

കോൺഗ്രസ് ജയിച്ച സംസ്ഥാനങ്ങളിലെ മുൻ ബിജെപി മുഖ്യമന്ത്രിമാര്‍ക്ക് രാഹുൽ നന്ദി പറഞ്ഞു. അതേസമയം പ്രധാനമന്ത്രി നരേന്ദ്ര മോദിയ്ക്കെതിരെ രൂക്ഷമായ വിമര്‍ശനമാണ് രാഹുൽ ഗാന്ധി അഴിച്ചുവിട്ടത്. യുവാക്കളെയും കര്‍ഷകരെയും മോദി പൊള്ള വാഗ്ദാനം നല്‍കി വഞ്ചിച്ചെന്ന് രാഹുൽ ആരോപിച്ചു.

ബിജെപിയെ ചെറുക്കുന്ന കാര്യത്തിൽ പ്രതിപക്ഷ പാര്‍ട്ടികള്‍ക്കെല്ലാം ഒരേ മനസ്സാണെന്നും എസ്‍‍പിയും ബിഎസ്‍‍പിയും കോൺഗ്രസിനൊപ്പം നിൽക്കുമെന്നും രാഹുൽ ഗാന്ധി പറഞ്ഞു. 2019ൽ ബിജെപിയെ തോൽപ്പിക്കും. ആരെയും ഭാരത്തിൽ നിന്ന് മുക്തമാക്കാൻ ആഗ്രഹിക്കുന്നില്ലെന്നും വിയോജിപ്പുള്ളവരെ ഇല്ലാതാക്കൽ കോൺഗ്രസിന്‍റെ ലക്ഷ്യമല്ലെന്നും രാഹുൽ ഗാന്ധി പറഞ്ഞു.