രാജസ്ഥാനിൽ പെട്രോളിനും ഡീസലിനും വാറ്റ് കുറച്ചു

ജയ്‌പൂർ: രാജ്യമെമ്പാടും ഇന്ധന വില കുതിക്കുമ്പോൾ പെട്രോളിന്റെയും ഡീസലിന്റെയും മൂല്യവർധിത നികുതിയിൽ രാജസ്ഥാൻ സർക്കാർ കുറവ് വരുത്തി. നാല് ശതമാനം വാറ്റ് ആണ് കുറച്ചത്.

രാജസ്ഥാൻ മുഖ്യമന്ത്രി വസുന്ധര രാജെ സിന്ധ്യയാണ് ഇന്നലെ പ്രഖ്യാപനം നടത്തിയത്.വാറ്റ് നാല് ശതമാനം കുറച്ചതോടെ സംസ്ഥാനത്ത് പെട്രോളിനും ഡീസലിനും രണ്ടര രൂപ കുറയും. ഇന്നലെ അർധരാത്രിയോടെ പുതിയ വാറ്റ് നിരക്ക് പ്രാബല്യത്തിൽ വന്നു. പെട്രോളിന്റെ വാറ്റ് 30 ശതമാനത്തിൽ നിന്ന് 26 ശതമാനവും ഡീസലിന്റെ വാറ്റ് 22 ശതമാനത്തിൽ നിന്ന് 18 ശതമാനവുമായി കുറച്ചു. മുഖ്യമന്ത്രിയുടെ രാജസ്ഥാൻ ഗൗരവ് യാത്രയുടെ ഭാഗാമായി ഹനുമാൻഗറിലെ രാവത്സറിൽ നടത്തിയ പൊതുസമ്മേളനത്തിലാണ് വാറ്റ് കുറയ്ക്കുന്നതായി പ്രഖ്യാപിച്ചത്.