'രാജസ്ഥാൻ കൊലപാതകി' മുസ്ലീം വിരോധി; കാരണം പ്രണയ നഷ്‍ടം

ഉദയ്‍പൂര്‍: രാജസ്ഥാനില്‍ മുസ്ലീം യുവാവിനെ മഴുവിന് വെട്ടി തീവച്ചു കൊന്ന സംഭവത്തില്‍ പുതിയ വെളിപ്പെടുത്തലുകള്‍.

പ്രതിയായ ശംഭുലാല്‍ പ്രണയിച്ചിരുന്ന പെണ്‍കുട്ടി ഒരു മുസ്ലീം യുവാവിനൊപ്പം ഒളിച്ചോടിയതാണ് ഇയാളുടെ മുസ്ലീം വിരോധത്തിന് കാരണമെന്ന് അടുത്ത സുഹൃത്തുക്കള്‍ ടൈംസ് ഓഫ് ഇന്ത്യയോട് പറഞ്ഞു.

മാര്‍ബിള്‍ തൊഴിലാളിയായിരുന്നു പ്രതി. നോട്ടുനിരോധനം വന്നതോടെ ഇയാളുടെ തൊഴില്‍ നഷ്‍ടമായി. പിന്നീട് പലരോടും കടംവാങ്ങിയിരുന്നു. ഏകദേശം 1.5 ലക്ഷം രൂപയോളം ഇയാള്‍ക്ക് കടമുണ്ട് - സുഹൃത്തുക്കള്‍ പറഞ്ഞു.

പ്രായപൂര്‍ത്തിയാകാത്ത ഒരു പെണ്‍കുട്ടിയുമായി ശംഭുലാല്‍ പ്രണയബന്ധത്തിലായിരുന്നു. ഈ കുട്ടി ഒരു മുസ്ലീം യുവാവിനൊപ്പം പോയി. പെണ്‍കുട്ടിയെ കണ്ടെത്താന്‍ പശ്ചിമബംഗാളിലേക്ക് ആളുകളുമായി ഇയാള്‍ പോയിരുന്നു. അവിടെ വച്ച് മര്‍ദ്ദനമേല്‍ക്കുകയും ചെയ്‍തു.

ഇതിന് മുന്‍പും വ്യത്യസ്‍ത മതത്തില്‍പ്പെട്ടവര്‍ തമ്മില്‍ നടന്ന വിവാഹങ്ങള്‍ ഈ മേഖലയില്‍ ഉണ്ടായിട്ടുണ്ടെന്ന് നാട്ടുകാര്‍ പറയുന്നു. ശംഭുലാലിനെ ഇത്തരം വാര്‍ത്തകള്‍ അസ്വസ്ഥാനാക്കിയിരുന്നതായും ഒരു സുഹൃത്ത് പറഞ്ഞു.

മദ്യത്തിലും ലഹരിയിലും ആസക്തനായിരുന്ന ശംഭുലാല്‍ മണിക്കൂറുകളോളം ഇന്‍റര്‍നെറ്റ് ഉപയോഗിക്കാനും തുടങ്ങിയിരുന്നതായി അടുത്ത സുഹൃത്തുക്കള്‍ പറഞ്ഞു.