അഞ്ചാംക്ലാസിലെ കുട്ടികൾക്ക് പഠിക്കാന്‍ ‘പശു എഴുതുന്ന കത്ത്’

രാജസ്ഥാന്‍: രാജസ്ഥാനിലെ കുട്ടികള്‍ക്ക് പഠിക്കാന്‍ ഇനി പശു എഴുതുന്ന കത്തും. അഞ്ചാംക്ലാസ് ഹിന്ദി പാഠപുസ്തകത്തിലാണ് ഗോമാതാവിന്‍റെ പാഠഭാഗം ഉൾപ്പെടുത്തിയിട്ടുള്ളത്. രാജസ്ഥാനിലെ ഗവണ്‍മെന്റ് സ്‌ക്കൂളിലെ പാഠപുസ്തകത്തിലാണ് പശു, തന്നെ ഗോമാതവായി കാണുന്നതുകൊണ്ടുള്ള ഗുണങ്ങളെപ്പറ്റി വിദ്യാര്‍ത്ഥികളോട് പറയുന്ന രീതിയിലുള്ള കത്ത് ഉള്‍പ്പെടുത്തിയിരിക്കുന്നത്.
'എന്‍റെ ആൺ, പെൺ മക്കളെ എന്ന അഭിസംബോധനയോടെ‍യാണ് പാഠഭാഗം ആരംഭിക്കുന്നത്. ഞാൻ എല്ലാവർക്കും കരുത്തും ബുദ്ധിയും, ആയുരാരോഗ്യ സൗഖ്യവും സമൃദ്ധിയും സന്തോഷവും നൽകുന്നു. എന്‍റെ പ്രാധാന്യം മനസിലാക്കി എന്നെ അമ്മയായി ആരാധിക്കുന്നവർക്ക് എന്‍റെ അനുഗ്രഹം ഉണ്ടായിരിക്കും. പശുവിനെ അമ്മയായി കണ്ടാൽ ഗുണം ഉണ്ടാകുമെന്ന് പറയാൻ ഞാൻ ആഗ്രഹിക്കുന്നു'- കത്തിൽ ഗോമാതാവ് വ്യക്തമാക്കുന്നു.

പശുവിനെക്കുറിച്ച് അനുകൂലമായ കാഴ്ചപ്പാട് കുട്ടികളിലുണ്ടാക്കാനാണ് ഇത്തരം കാര്യങ്ങള്‍ ഉള്‍പ്പെടുത്തുന്നത് എന്നാണ് വിദ്യാഭ്യാസ വകുപ്പിന്റെ വാദം. പശു മനുഷ്യന് നല്‍കുന്ന അമൃതാണ് പാലും വെണ്ണയും നെയ്യും. പിന്നീട് പശുവിന്റെ ചാണകവും മൂത്രവും ഔഷധമാണെന്നും കൃഷിയാവശ്യങ്ങള്‍ക്കായി കീടനാശിനിയാണെന്നും കത്തില്‍ ഓര്‍മ്മിപ്പിക്കുന്നു. ഇതിനുപുറമേ പശുക്കള്‍ ശ്വസിക്കുന്നതിലൂടെ അന്തരീക്ഷം ശുദ്ധിയാക്കുന്നതായി പുസ്തകത്തിലുണ്ട്.

വലിയ പശുവിന്‍റെ ചിത്രത്തിൽ ഹിന്ദു ദൈവങ്ങളെ ഉൾപ്പെടുത്തിയ ചിത്രവും പാഠഭാഗത്ത് ഉൾപ്പെടുത്തിയിരിക്കുന്നു. മൃഗങ്ങളെപ്പറ്റി കുട്ടികളില്‍ ചെറിയ പ്രായത്തില്‍ തന്നെ അവബോധം സൃഷ്ടിക്കാന്‍ വേണ്ടിയാണ് ഇത്തരം കാര്യങ്ങള്‍ പാഠ്യപദ്ധതിയില്‍ ഉള്‍പ്പെടുത്തുന്നത് എന്നാണ് മൃഗസംരക്ഷണ വകുപ്പ് മന്ത്രിയായ ഉത്ത്‌റാം ദേവസി പറയുന്നത്.