റെയിൽവേ ട്രാക്കിലേക്ക് ട്രക്ക് ഇടിച്ചുകയറി; രാജധാനി എക്സ്പ്രസ് പാളം തെറ്റി

ഭോപ്പാൽ: മധ്യപ്രദേശിലെ തണ്ടലയിൽവെച്ച് തിരുവനന്തപുരം-മധ്യപ്രദേശ് രാജധാനി എക്സ്പ്രസ് പാളംതെറ്റി. ട്രക്ക് പാളത്തിലെക്ക് ഇടിച്ചുകയറിയതിനെത്തുടർന്നായിരുന്നു സംഭവം. റെയിൽവേ ഗേറ്റ് തകർത്തെത്തിയ ട്രക്കാണ് ട്രെയിനുമായി കൂട്ടിയിടിച്ചത്. അപകടത്തിൽ ട്രക്ക് ഡ്രൈവർ കൊല്ലപ്പെട്ടു.
വ്യാഴാഴ്ച രാവിലെ 6.44ന് ഗേറ്റ് മാനുള്ള റെയിൽവേ ഗേറ്റ് തകർത്ത് ഹസ്രത്ത്-നിസാമുദ്ദീൻ-തിരുവനന്തപുരം രാജധാനി എക്സ്പ്രസിൽ (12431) ഇടിക്കുകയായിരുന്നുവെന്ന് റെയിൽവേ ഉദ്യോഗസ്ഥനായ രാജേഷ് ദത്ത് ബാജ്പൈ പറഞ്ഞു. ട്രെയിന്റെ ബി ഏഴ്, ബി എട്ട് എന്നീ കോച്ചുകളിലേക്കാണ് ട്രക്ക് ഇടിച്ചുകയറിയതെന്നും അദ്ദേഹം വ്യക്തമാക്കി.

രണ്ട് കോച്ചുകളിലെയും യാത്രക്കാരെ മാറ്റിയിട്ടുണ്ട്. റെയിൽവേ ഗതാഗതം പൂർവ്വസ്ഥിതിയിലാക്കാനുള്ള ശ്രമം പുരോഗമിച്ചുവരികയാണെന്നും വെസ്റ്റേൺ റെയിൽവേ അധികൃതർ പറഞ്ഞു. അതേസമയം അപകടം നടന്ന റെയിൽവേ ഗേറ്റ് വഴിയുള്ള ഗതാഗതം തടസ്സപ്പെട്ടിരിക്കുകയാണ്.