രജനീകാന്തിന്‍റെ ശ്രീലങ്ക സന്ദര്‍ശനം റദ്ദാക്കി

ചെന്നൈ: ശ്രീലങ്കയിലെ തമിഴര്‍ക്ക് വീട് നല്‍കുന്ന പരിപാടിയില്‍ പങ്കെടുക്കാനുള്ള യാത്ര തമിഴ് സൂപ്പര്‍ താരം രജനീകാന്ത് ഉപേക്ഷിച്ചു. തമിഴ് അനുകൂല സംഘടനകളുടെ അഭ്യര്‍ത്ഥന മാനിച്ചാണ് ശ്രീലങ്കയിലേക്കുള്ള യാത്ര ഉപേക്ഷിച്ചത്.

വൈക്കോ ഉള്‍പ്പെടെയുള്ള വിവിധ നേതാക്കള്‍ രജനീകാന്തിനെ നേരിട്ട് കണ്ടും ഫോണിലൂടെയും പരിപാടിയില്‍നിന്ന് പിന്മാറണമെന്ന് ആവശ്യപ്പെട്ടിരുന്നു. പരിപാടിയില്‍നിന്ന് വിട്ടുനില്‍ക്കേണ്ടതിന്‍റെ രാഷ്ട്രീയപരമായ ആവശ്യകത ഇവര്‍ രജനിയുമായി പങ്കുവെച്ചിരുന്നു. നേതാക്കന്മാരുടെ ആവശ്യം തനിക്ക് പൂര്‍ണമായി ഉള്‍ക്കൊള്ളാന്‍ കഴിഞ്ഞില്ലെങ്കിലും അവരുടെ അഭ്യര്‍ത്ഥന മാനിച്ച് പരിപാടിയില്‍ പങ്കെടുക്കാനുള്ള തീരുമാനത്തില്‍നിന്ന് പിന്‍വാങ്ങുകയാണെന്ന് അദ്ദേഹം പറഞ്ഞു.

ലൈക ഗ്രൂപ്പിനു കീഴിലുള്ള ജ്ഞാന ഫൗണ്ടേഷന്‍ ഉത്തര ജാ‍ഫ്‍നയിലെ തമിഴ് വംശജര്‍ക്ക് വീട് നിര്‍മിച്ച് നല്‍കുന്ന പരിപാടിയിലാണ് രജനി പങ്കെടുക്കാനിരുന്നത്. ലൈക ഗ്രൂപ്പിന്‍റെ ഉടമയായ സുഭാഷ്‍കരന്‍ അല്ലിരാജയാണ് രജനീകാന്തിന്‍റെ പുതിയ സിനിമയായ 2.0 നിര്‍മിക്കുന്നത്. ഇദ്ദേഹത്തിന് മുന്‍ ശ്രീലങ്കന്‍ പ്രസി‍ഡന്‍റ് മഹീന്ദ രാജപക്‍സെയുമായി ബന്ധമുണ്ടെന്നാണ് തമിഴ്‍ സംഘടനകളുടെ ആരോപണം.

Rajinikanth cancels visit to Sri Lanka

Rajinikanth was scheduled to give away homes for displaced Tamils.