അയോധ്യ ഭൂമി പൂജയിൽ നരേന്ദ്ര മോദിയ്ക്കൊപ്പം വേദി പങ്കിട്ട നൃത്യഗോപാൽ ദാസിന് കൊവിഡ്

ന്യൂഡൽഹി: അയോധ്യ ഭൂമി പൂജ വേളയിൽ പ്രധാനമന്ത്രി നരേന്ദ്ര മോദിയ്ക്കൊപ്പം വേദി പങ്കിട്ട രാമ ജന്മഭൂമി ട്രസ്റ്റ് മേധാവി നൃത്യഗോപാൽ ദാസിന് കൊവിഡ് സ്ഥിരീകരിച്ചു. ഓഗസ്റ്റ് അഞ്ചിനു നടന്ന രാമക്ഷേത്ര ശിലാസ്ഥാപന വേളയിൽ പ്രധാനമന്ത്രിയ്ക്കൊപ്പം വേദി പങ്കിട്ട അഞ്ച് പേരിൽ ഒരാളായിരുന്നു നൃത്യഗോപാൽ ദാസ്.

ജന്മാഷ്ടമി ആഘോഷങ്ങൾക്കായി മഥുരയിലാണ് നൃത്യഗോപാൽ ദാസ് ഇപ്പോഴെന്നാണ് റിപ്പോർട്ടുകൾ വ്യക്തമാക്കുന്നത്. ഇദ്ദേഹത്തെ കൃത്യമായി പരിപാലിക്കണമെന്ന് ഉത്തർപ്രദേശ് മുഖ്യമന്ത്രി യോഗി ആദിത്യനാഥ് ജില്ലാ ഉദ്യോഗസ്ഥർക്ക് നിർദേശം നൽകി. ആദിത്യനാഥ് മെഡിക്കൽ വിദഗ്ധരുമായും സംസാരിച്ചിട്ടുണ്ട്. നൃത്യഗോപാൽ ദാസിനെ മേദാന്ത ആശുപത്രിയിലേക്ക് മാറ്റാൻ സാധ്യതയുണ്ട്.

Also Read: എച്ച് 1 ബി വിസയുള്ളവര്‍ക്ക് തിരികെ വരാം; നിബന്ധനകളോടെ ഇളവുകളുമായി US

മോദിയ്ക്കും നൃത്യഗോപാൽ ദാസിനും പുറമെ ഉത്തർപ്രദേശ് ഗവര്‍ണര്‍ ആനന്ദിബെന്‍ പട്ടേല്‍, മുഖ്യമന്ത്രി യോഗി ആദിത്യനാഥ്, ആര്‍എസ്എസ് മേധാവി മോഹന്‍ ഭാഗവത് എന്നിവരായിരുന്നു അയോധ്യ ശിലാസ്ഥാപന വേദിയിൽ ഉണ്ടായിരുന്നത്. നേരത്തെ ശിലാസ്ഥാപനം നടക്കുന്നതിന് മുന്നേ ഡ്യൂട്ടിയിലുണ്ടായിരുന്ന പോലീസുകാർക്കും ഒരു പുരോഹിതനും കൊവിഡ് സ്ഥിരീകരിച്ചിരുന്നു.

അതേസമയം രാജ്യത്ത് കൊവിഡ് കേസുകൾ 24 ലക്ഷത്തിലേക്ക് അടുക്കുകയാണ്. കഴിഞ്ഞ 24 മണിക്കൂറിനിടെ 66,999 പേർക്കാണ് രാജ്യത്ത് കൊവിഡ് സ്ഥിരീകരിച്ചതെന്നാണ് കേന്ദ്ര ആരോഗ്യ മന്ത്രാലയം വ്യക്തമാക്കിയിരിക്കുന്നത്. ഇന്ന് മരണസംഖ്യയിലും വൻ വർധനവാണ് റിപ്പോർട്ട് ചെയ്തിരിക്കുന്നത്. 942 പേർക്കാണ് ഈ സമയപരിധിക്കിടെ കൊവിഡ് മൂലം ജീവൻ നഷ്ടപ്പെട്ടത്. ഇതോടെ രാജ്യത്തെ കൊവിഡ് മരണങ്ങൾ 47,033 ആയി ഉയർന്നു.