അമ്മയെ കൊന്ന് ഒളിവിൽ പോയ പീഡനക്കേസ് പ്രതി പിടിയിൽ

മുംബൈ: ഏഴുവയസുകാരിയെ പീഡിപ്പിച്ച് കൊന്ന കേസിൽ ജാമ്യത്തിലിറങ്ങി അമ്മയെ കൊലപ്പെടുത്തി
ആഭരണങ്ങളുമായി മുങ്ങിയ ചെന്നൈ സ്വദേശി മുംബൈയില്‍ അറസ്റ്റിലായി. 23 കാരനായ എസ്. ദഷ്വന്ത് 45 കാരിയായ അമ്മ സരളയെ കൊലപ്പെടുത്തിയ ശേഷമാണ് ഒളിവില്‍പ്പോയത്. കഴിഞ്ഞ ശനിയാഴ്‌ചയാണ്‌ സരളയെ തലക്ക് അടിയേറ്റ് മരിച്ച നിലയിൽ കണ്ടെത്തിയത്. ആഭരണങ്ങള്‍ ദഷ്വന്തിന്‍റെ സുഹൃത്തിന്‍റെ കൈയില്‍ നിന്നും പിടിച്ചെടുത്തിരുന്നു.

ജാമ്യത്തിലിറങ്ങിയ ദഷ്വന്ത് അമ്മയുടെ പക്കൽ നിന്നും 25 പവനോളം കവർന്നെടുത്തു. തൊട്ടടുത്ത ഫ്ളാറ്റിലെ ഏഴുവയസ്സുകാരിയെ പീഡിപ്പിച്ച് കൊലപ്പെടുത്തിയ കേസില്‍ കഴിഞ്ഞ ഫെബ്രുവരിയിൽ ഇയാള്‍ അറസ്റ്റിലായിരുന്നു. പിന്നീട് അച്ഛന്‍ നല്‍കിയ ഹര്‍ജിയെത്തുടര്‍ന്നാണ് സെപ്‍റ്റമ്പറില്‍ ജാമ്യം ലഭിച്ചത്.
സുഹൃത്തുക്കളെയും മൊബൈല്‍ഫോണും കേന്ദ്രീകരിച്ച് നടത്തിയ അന്വേഷണത്തിലാണ് ദഷ്വന്ത് പിടിയിലായത്. തമിഴ്‌നാട്ടിൽ നിന്നുള്ള പ്രത്യേക അന്വേഷണ സംഘമാണ് ഇയാളെ അറസ്റ്റ് ചെയ്തത്.