രാജിയ്ക്കൊരുങ്ങി ഊർജിത് പട്ടേൽ; 19ന് രാജി സമർപ്പിച്ചേക്കും

ന്യൂഡൽഹി: ധനമന്ത്രാലയവുമായി തുടര്‍ച്ചയായുണ്ടായ അഭിപ്രായവ്യത്യാസങ്ങള്‍ക്കൊടുവിൽ ഊര്‍ജിത് പട്ടേൽ റിസര്‍വ് ബാങ്ക് ഗവര്‍ണര്‍ സ്ഥാനത്തുനിന്ന് രാജി വെച്ചേക്കുമെന്ന് റിപ്പോര്‍ട്ട്. നവംബര്‍ 19ന് നടക്കുന്ന ബോര്‍ഡ് യോഗത്തിൽ ഊര്‍ജിത് പട്ടേൽ രാജി സമര്‍പ്പിച്ചേക്കുമെന്നാണ് മണിലൈഫ് റിപ്പോര്‍ട്ട്.

Read More: എന്താണ് റിസര്‍വ് ബാങ്കും ധനമന്ത്രാലയവും തമ്മിലുള്ള പ്രശ്നം?

റിസര്‍വ് ബാങ്കിന്‍റെ സ്വയംഭരണത്തിനു മേൽ കേന്ദ്രസര്‍ക്കാരിന് ഇടപെടാൻ അവസരം നല്‍കുന്ന ഏഴാം വകുപ്പ് ഉപയോഗിക്കാനുള്ള ധനമന്ത്രാലയത്തിന്‍റെ നീക്കത്തിനു പിന്നാലെയാണ് ഊര്‍ജിത് പട്ടേലും ധനമന്ത്രാലയവും തമ്മിൽ ഇടഞ്ഞത്. പക്ഷെ, യുപിഎ സര്‍ക്കാരിന്‍റെ കാലത്ത് കയ്യയച്ച് വായ്പകള്‍ നല്‍കാൻ ബാങ്കുകളെ അനുവദിച്ചതാണ് സാമ്പത്തികരംഗത്തെ പ്രശ്നങ്ങള്‍ക്ക് കാരണമെന്നും യുപിഎ സര്‍ക്കാരിന്‍റെ നിര്‍ദേശങ്ങള്‍ ആര്‍ബിഐ തൊണ്ട തൊടാതെ വിഴുങ്ങുകയായിരുന്നുവെന്നുമുള്ള ധനമന്ത്രി അരുൺ ജെയ്റ്റ്ലിയുടെ പ്രസ്താവനകള്‍ ഇതിനു മുൻപേ ഊര്‍ജിത് പട്ടേലിനെ ചൊടിപ്പിച്ചിരുന്നു. ഒടുവിലായി ആര്‍ബിഐയുടെ കരുതൽ ധനത്തിൽ നിന്ന് 3.6 ലക്ഷം കോടി രൂപ വേണമെന്ന കേന്ദ്രസര്‍ക്കാര്‍ ആവശ്യവും ആര്‍ബിഐ നിരസിച്ചിരുന്നു.