അലഹബാദിന്‍റെ പേര് 'പ്രയാഗ്' എന്നാക്കി മാറ്റണമെന്ന് മന്ത്രി

ലക്നൌ: അലഹബാദിന്‍റെ പേര് മാറ്റി പ്രയാഗ് എന്നാക്കി മാറ്റണമെന്ന് ശുപാര്‍ശ ചെയ്ത് ഉത്തര്‍പ്രദേശ് ആരോഗ്യമന്ത്രി സിദ്ധാര്‍ഥ് നാഥ് സിംഗ്. ഇക്കാര്യം ചൂണ്ടിക്കാണിച്ചുകൊണ്ട് ഗവര്‍ണര്‍ രാം നായിക്കിന് കത്തെഴുതിയതായും അദ്ദേഹം പറഞ്ഞു.

ബോംബെ എന്ന പേര് മാറ്റി മുംബൈ എന്നാക്കാന്‍ മുന്‍കൈ എടുത്ത ആളാണ്‌ രാം നായിക്. 2019ല്‍ അലഹബാദില്‍ വച്ചു നടക്കുന്ന കുംഭമേളയ്ക്ക് മുന്നേ പേര് മാറും എന്നാണ് പ്രതീക്ഷിക്കപ്പെടുന്നത്. ഈയിടെ മുഗള്‍സാരായ് സ്റ്റേഷന്‍റെ പേര് മാറ്റി ദീന്‍ ദയാല്‍ ഉപാധ്യായ് സ്റ്റേഷന്‍ എന്നാക്കി മാറ്റിയിരുന്നു.

പതിനാറാം നൂറ്റാണ്ടില്‍ അലഹബാദിന്‍റെ പേര് പ്രയാഗ് എന്നായിരുന്നു എന്ന് ബിജെപി വക്താക്കള്‍ അവകാശപ്പെടുന്നു. മുഗള്‍ ഭരണത്തിന്‍ കീഴില്‍ ഇതിന്‍റെ പേര് 'ലഹബാദ്' എന്ന് മാറ്റപ്പെടുകയും പിന്നീട് അത് ലോപിച്ച് 'അലഹബാദ്' എന്നായി മാറുകയും ചെയ്തു. തിരിച്ച് പഴയ പേര് തന്നെ നല്‍കാന്‍ ആണ് തങ്ങള്‍ ആവശ്യപ്പെടുന്നതെന്നും അവര്‍ പറയുന്നു.

ഈ മേയ് മാസത്തില്‍ മുഖ്യമന്ത്രി യോഗി ആദിത്യനാഥ് അലഹബാദ് സന്ദര്‍ശിച്ച സമയത്ത് പേര് മാറ്റുന്ന കാര്യം സൂചിപ്പിച്ചു കൊണ്ട് അഖില ഭാരതീയ അഖാര പരിഷത്ത് നേതാക്കള്‍ അദ്ദേഹത്തെ കണ്ടിരുന്നു.