ദ്രൗപദി മു‍ര്‍മുവിന്‍റെ നേട്ടത്തിൽ അഭിമാനം, ഇത് എല്ലാവർക്കും പ്രചോദനമെന്ന് സഹോദരൻ

ന്യൂഡൽഹി: രാജ്യത്തിന്‍റെ പതിനഞ്ചാമത് രാഷ്ട്രപതിയായി ദ്രൗപദി മുർമു. 2821 വോട്ടുകളാണ് ദ്രൗപദി മുർമു നേടിയത്. 6,76, 803 വോട്ട് മൂല്യമാണ് ദ്രൗപദി സ്വന്തമാക്കിയത്. രാജ്യത്തെ ആദ്യത്തെ ഗോത്രവര്‍ഗ പ്രസിഡന്‍റും രണ്ടാമത്തെ വനിതാ പ്രസിഡന്‍റുമാണ് ഒഡിഷ സ്വദേശിയായ ദ്രൗപദി മുര്‍മു.1958 ജൂണ്‍ 20ന് ഒഡീഷയിലെ മയൂര്‍ഭഞ്ച് ജില്ലയിലെ ഉപര്‍ബേഡ ഗ്രാമത്തിലാണ് ദ്രൗപദി മു‍ര്‍മുവിന്‍റെ ജനനം.
New President Draupadi Murmu: ചരിത്രം രചിച്ച് ദ്രൗപതി മുർമു, ഇന്ത്യയുടെ പുതിയ രാഷ്ട്രപതി64 കാരിയായ മുർമു സന്താൾ ഗോത്ര വിഭാഗത്തിൽ നിന്നുള്ള വ്യക്തിയാണ്. ഗോത്രവിഭാഗത്തിൽ നിന്നുള്ള വനിതയായ തന്‍റെ സഹോദരി രാജ്യത്തെ ഉന്നതപദവിയിലെത്തിയതിൽ അഭിമാനമുണ്ടെന്ന് സഹോദരൻ ടരിനിസെൻ ടുഡു മാധ്യമങ്ങളോട് പറഞ്ഞു. കുട്ടിക്കാലം മുതൽ നിരവധി യാതനകൾ സഹിച്ചാണ് തന്‍റെ സഹോദരിഇവിടെ വരെ എത്തിയതെന്നും എല്ലാവർക്കും പ്രചോദനമാണ് ഈ വിജയമെന്നും ടുഡു കൂട്ടിച്ചേർത്തു. പ്രധാനമന്ത്രിയും പ്രതിരോധമന്ത്രിയും ആഭ്യന്തരമന്ത്രിയും അടക്കമുള്ളവർ ദ്രൗപദി മുർമുവിനെ അഭിനന്ദിച്ച് രംഗത്തെത്തി.




ദ്രൗപദി മുർമുവിനെ വീട്ടിൽ നേരിട്ടെത്തിയാണ് പ്രധാനമന്ത്രി അടക്കമുള്ളവർ അഭിനന്ദനം അറിയിച്ചത്. ബിജെപി ദേശീയ അധ്യക്ഷൻ ജെ പി നദ്ദയും ഒപ്പമുണ്ടായിരുന്നു. കക്ഷിരാഷ്ട്രീയത്തിന് അതീതമായി ദ്രൗപദി മുർമുവിന് വോട്ട് ചെയ്ത എല്ലാ എംപിമാർക്കും എംഎൽഎമാർക്കും നന്ദി അറിയിക്കുന്നതായും പ്രധാനമന്ത്രി പറഞ്ഞു. 1.3 ബില്യൺ ഇന്ത്യക്കാർ ആസാദി കാ അമൃത് മഹോത്സവ് ആഘോഷിക്കുന്ന വേളയിൽ, കിഴക്കൻ ഇന്ത്യയിൽ ഒരു ഗോത്രവർഗത്തിൽ ജനിച്ച രാജ്യത്തിന്‍റെ മകൾ നമ്മുടെ പ്രസിഡന്‍റായി തിരഞ്ഞെടുക്കപ്പെട്ടു. ശ്രീമതി ദ്രൗപതി മുർമു എന്നാണ് പ്രധാനമന്ത്രി ട്വീറ്ററിൽ കുറിച്ചത്.


ജയം ഉറപ്പായ ശേഷം ദ്രൗപദി മുർമുവിനെ അഭിനന്ദിച്ച് എതിർ സ്ഥാനാർഥി യശ്വന്ത് സിൻഹയും രംഗത്തെത്തി. ദ്രൗപദിക്ക് നിർഭയം ഭരണഘടന സംരക്ഷിക്കാൻ കഴിയട്ടെയെന്നും രാജ്യത്തെ ഒരു പൗരൻ എന്ന നിലയിൽ അഭിനന്ദനമറിയിക്കുന്നുവെന്നും യശ്വന്ത് സിൻഹ ട്വീറ്റ് ചെയ്തു.