റായ്പ്പൂർ: നിറത്തിന്റെ പേരിലുള്ള നിരന്തരമായ കളിയാക്കലുകളെ തുടർന്ന് ഭാര്യ ഭർത്താവിനെ മഴുകൊണ്ട് വെട്ടിക്കൊലപ്പെടുത്തി. ഛത്തിസ്ഗഢിലെ ദുർഗ് ജില്ലയിലാണ് സംഭവം. 30കാരിയായ സംഗീത സ്വൻവാനിയെന്ന യുവതിയാണ് കറുത്ത നിറത്തിന്റെ പേരിൽ തന്നെ നിരന്തരം കളിയാക്കുന്ന ഭർത്താവിനെ കൊലപ്പെടത്തിയത്. കാണാൻ കൊള്ളില്ലെന്നും വിരൂപിയാണെന്നുമുള്ള ഭർത്താവിന്റെ കളിയാക്കലിനെ തുടർന്നാണ് യുവതിയുടെ കടുംകൈ. ഇക്കാരണത്താൽ ദമ്പതികൾ തമ്മിൽ വഴക്ക് പതിവായിരുന്നുവെന്ന് പോലീസ് പറയുന്നു.
ശനിയാഴ്ച രാത്രിയാണ് സംഭവം. പതിവുപോലെ ഭർത്താവ് കളിയാക്കൽ ആരംഭിച്ചതോടെ യുവതി വീട്ടിൽ സൂക്ഷിച്ചിരുന്ന മഴുവെടുത്ത് വെട്ടുകയായിരുന്നു. 40കാരനായ ഭർത്താവ് അനന്ത് സോൻവാനി സംഭവ സ്ഥലത്തുവെച്ച് തന്നെ മരിച്ചു. ആദ്യ ഭാര്യയുടെ മരണത്തിന് പിന്നാലെയാണ് അനന്ത് സോൻവാനി സംഗീതയെ വിവാഹം ചെയ്യുന്നത്.
Read Latest National News and Malayalam News
പിറ്റേ ദിവസം രാവിലെ തന്റെ ഭർത്താവിനെ ആരോ കൊലപ്പെടുത്തിയെന്ന് പറഞ്ഞ് ഗ്രാമവാസികളെ തെറ്റിദ്ധരിപ്പിക്കാനും സംഗീത ശ്രമിച്ചതായി പോലീസ് പറയുന്നു. എന്നാൽ പിന്നീട് പോലീസിന്റെ ചോദ്യം ചെയ്യലിൽ സംഗീത കുറ്റം സമ്മതിക്കുകയായിരുന്നു. കൊലപാതകക്കുറ്റം ചുമത്തി സംഗീതയെ അറസ്റ്റ് ചെയ്തിട്ടുണ്ട്.