ഞെട്ടിക്കുന്ന കണക്കുള്ളത് കേരളത്തിൽ; രാജ്യത്ത് 32,937 പുതിയ കൊവിഡ് കേസുകൾ കൂടി

സംസ്ഥാന ആരോഗ്യവകുപ്പ ഞായറാഴ്ച പുറത്തുവിട്ട കണക്കുകൾ പ്രകാരം സംസ്ഥാനത്ത് 18,582 പുതിയ കേസുകളാണ് റിപ്പോർട്ട് ചെയ്തത്. ടെസ്റ്റ് പോസിറ്റിവിറ്റി നിരക്ക് 15.11 ആയി ഉയരുകയും ചെയ്തു. 1,78,630 പേരാണ് രോഗം സ്ഥിരീകരിച്ച് ഇനി ചികിത്സയിലുള്ളത്. വിവിധ ജില്ലകളിലായി 4,99,031 പേരാണ് ഇപ്പോള്‍ നിരീക്ഷണത്തിലുള്ളത്. ഞായറാഴ്ച 102 മരണങ്ങൾ കൂടി സ്ഥിരീകരിച്ചതോടെ സംസ്ഥാനത്തെ ആകെ കൊവിഡ് മരണങ്ങളുടെ എണ്ണം 18,601 ആയി ഉയരുകയും ചെയ്തു. ഇതുവരെ 34,92,367 പേര്‍ കൊവിഡില്‍ നിന്നും മുക്തി നേടി.

കഴിഞ്ഞ ദിവസങ്ങളിലെ കണക്കുകളുമായി താരതമ്യം ചെയ്യുമ്പോൾ രാജ്യത്തെ പ്രതിദിന കൊവിഡ് കേസുകളിൽ നേരിയ കുറവുണ്ടായി. കഴിഞ്ഞ 24 മണിക്കൂറിനിടെ 32,937 പുതിയ കേസുകളാണ് റിപ്പോർട്ട് ചെയ്തതെന്ന് കേന്ദ്ര ആരോഗ്യ മന്ത്രാലയം വ്യക്തമാക്കി. ഇതോടെ രാജ്യത്ത് സ്ഥിരീകരിച്ച ആകെ കൊവിഡ് കേസുകളുടെ എണ്ണം വർധിച്ചു. 32,937 പുതിയ കേസുകളിൽ 18,582 രോഗബാധിതർ കേരളത്തിൽ നിന്നുള്ളവരാണ്.

കൊവിഡ് മരണസംഖ്യയിൽ കുറവ് സംഭവിക്കാത്തത് ആശങ്കയുണ്ടാക്കുന്നുണ്ട്. കഴിഞ്ഞ 24 മണിക്കൂറിൽ 417 മരണങ്ങളാണ് സ്ഥിരീകരിച്ചത്. ഇതോടെ രാജ്യത്തെ ആകെ കൊവിഡ് മരണങ്ങളുടെ എണ്ണം 431642 ആയി ഉയർന്നു. കേരളത്തിൽ 102 കൊവിഡ് മരണങ്ങളാണ് റിപ്പോർട്ട് ചെയ്തത്.

കേന്ദ്ര ആരോഗ്യ മന്ത്രാലയം ഇന്ന് രാവിലെ പുറത്തുവിട്ട കണക്കുകൾ പ്രകാരം കഴിഞ്ഞ 24 മണിക്കൂറിനിടെ 35,909 പേർ കൊവിഡ് മുക്തി നേടി. ഇതോടെ രാജ്യത്ത് കൊവിഡ് മുക്തി നേടിയവരുടെ ആകെ എണ്ണം 31411924 ആയി ഉയർന്നു. വിവിധ സംസ്ഥാനങ്ങളിലായി 3,81,947 സജീവ കേസുകളാണ് നിലവിലുള്ളത്. രാജ്യത്ത് ഇതുവരെ 54,58,57,108 പേർക്ക് കൊവിഡ് പ്രതിരോധ വാക്സിൻ നൽകിയതായും കേന്ദ്രം അറിയിച്ചു.