ശ്രീദേവിയുടെ മരണത്തിൽ 'ദാവൂദ് ഇബ്രാഹിമിന് പങ്ക്' ?

മുംബൈ: നടി ശ്രീദേവി മരിച്ചത് ബാത്ത് ടബ്ബിൽ മുങ്ങിയമല്ലെന്നും നടിയുടേത് ആസൂത്രിതമായ കൊലപാതകമാണെന്നും ആവർത്തിച്ച് മുൻ എസിപി വേദ് ഭൂഷൺ രംഗത്ത്. അധോലോക നായകന് ‍ ദാവൂദ് ഇബ്രഹാമിന് ശ്രീദേവിയുടെ മരണത്തിൽ വ്യക്തമായ പങ്കുണ്ടെന്നാണ് വേദ് ഭൂഷൺഇപ്പോൾ ആരോപിക്കുന്നത്. ശ്രീദേവി അവസാന സമയത്ത് താമസിച്ച ജുമേറ എമിരേറ്റ്‌സ് ടവര്‍ ഹോട്ടൽ ദാവൂദ് ഇബ്രാഹിമിന്‍റെ ഉടമസ്ഥതയിൽ ഉളളതാണെന്നും അദ്ദേഹം ചൂണ്ടിക്കാട്ടുന്നു.

പോലീസിൽ നിന്ന് വിരമിച്ച ശേഷം സ്വകാര്യ കുറ്റാന്വേഷണ ഏജൻസി നടത്തുകയാണ് വേദ് ഭൂഷൺ ഇപ്പോൾ. ഇതിന്‍റെ ഭാഗമായി ദുബായ്‍‍യിൽ പോയി സൂക്ഷ്മ പരിശോധന നടത്തിയ ശേഷം നടത്തിയ വാർത്താ സമ്മേളനത്തിലാണ് ഞെട്ടിപ്പിക്കുന്ന വെളിപ്പെടുത്തൽ നടത്തിയത്. ദുബായ് പൊലീസിനോട് ശ്രീദേവിയുടെ രക്ത സാമ്പിളികളും ശ്വാസകോശത്തിൽ എത്രത്തോളം വെളളം എത്തിയെന്നതിന്‍റെ റിപ്പോർട്ടും ആവശ്യപ്പെട്ടിട്ടും അവര്‍ അത് നൽകാൻ തയ്യാറായില്ലെന്നും ഇത് സംശയത്തിന് വകവെയ്ക്കുന്നെന്നും വേദ് ഭൂഷൺ വാർത്താസമ്മേളനത്തിൽ ചൂണ്ടിക്കാട്ടി. ശ്രീദേവിയുടെ പേരിൽ 240 കോടി രൂപയുടെ ഇൻഷുറൻസ് പോളിസി ഉണ്ടായിരുന്നു എന്നതും സംശയത്തോടെ മാത്രമേ നോക്കിക്കാണാൻ സാധിക്കുകയുള്ളൂ എന്നും വേദ് ഭൂഷൺ പറഞ്ഞു.

എന്തുകൊണ്ടാണ് ഈ കേസ് ഇത്ര പെട്ടെന്ന് തീർപ്പാക്കിയതെന്ന് അറിയണമെന്നും അന്വേഷണം ആരംഭിച്ച് മണിക്കൂറുകൾക്കുള്ളിലാണ് കേസ് റദ്ദാക്കിയതെന്നും വേദ് ഭൂഷൺ ചൂണ്ടിക്കാട്ടി. ഇപ്പോഴും താൻ ഈ കേസ് വിട്ടിട്ടില്ലെന്നും കേസിന്‍റെ സത്യാവസ്ഥ പുറത്തുകൊണ്ടു വരുമെന്നും അദ്ദേഹം മാധ്യമങ്ങളെ അറിയിച്ചു. നിലവിലുള്ള സംശയങ്ങളുടെ അടിസ്ഥാനത്തിൽ ശ്രീദേവിയുടെ മരണം പുനരന്വേഷിക്കാൻ ആവശ്യപ്പെട്ട് സുപ്രീം കോടതിയിൽ അപ്പീൽ നൽകാനുള്ള നീക്കത്തിലാണ് വേദ് ഭൂഷൺ.