2 ജി കേസ് വിധി തെരഞ്ഞെടുപ്പ് ഫലത്തെ ബാധിക്കില്ലെന്ന് ടിടിവി ദിനകരന്‍

ചെന്നൈ: ആർകെ നഗർ ഉപതിരഞ്ഞെടുപ്പിൽ തങ്ങള്‍ വിജയിക്കുന്ന ആത്മവിശ്വാസം പ്രകടിപ്പിച്ച് അണ്ണാ ഡിഎംകെ വിമതനേതാവ് ടി ടി വി ദിനകരൻ. ജയലളിതയുടെ ആശുപത്രി ദൃശ്യങ്ങളോ 2ജി കേസിലെ വിധിയോ ഫലത്തെ ബാധിക്കില്ലെന്ന് ദിനകരന്‍ പറഞ്ഞു

എക്സിറ്റ് പോൾ സർവേകളിൽ വിശ്വാസമില്ല. താനും പ്രവർത്തകരും 20 ദിവസത്തോളം മണ്ഡലത്തിൽ തന്നെയുണ്ടായിരുന്നു. വലിയ മാർജിനിൽ ഞങ്ങൾ ജയിക്കുമെന്ന് ജനത്തിന് അറിയാം. ആശുപത്രിക്കിടക്കയിൽ ജയലളിത പരസഹായമില്ലാതെ ജ്യൂസ് കുടിക്കുന്ന 20 സെക്കൻഡ് വിഡിയോ പി വെട്രിവേൽ പുറത്തുവിട്ടത് അമ്മയുടെ പ്രതിഛായ മോശപ്പെടുത്താനല്ല.

ചിന്നമ്മ വി കെ ശശികലയ്ക്ക് എതിരെയുള്ള ആക്ഷേപങ്ങളും സമ്മർദങ്ങളും കുറയ്ക്കുക എന്ന ലക്ഷ്യത്തോടെയാകും വെട്രിവേൽ‌ വിഡിയോ പുറത്തുവിട്ടതെന്നും ദിനകരൻ പറഞ്ഞു. 2ജി സ്പെക്ട്രം അഴിമതിക്കേസിൽ ഡിഎംകെ നേതാക്കളായ എ രാജ, കനിമൊഴി എന്നിവരെ കോടതി വെറുതെ വിട്ടത് ആർകെ നഗറിലെ വോട്ടെടുപ്പിൽ സ്വാധീനമുണ്ടാക്കില്ലെന്നും ദിനകരൻ വ്യക്തമാക്കി.