ബിജെപി മന്ത്രി ബിയർ പാര്‍ലര്‍ ഉദ്‍ഘാടനം ചെയ്തത് വിവാദത്തിൽ

ലഖ്‍നൗ: ഉത്തർപ്രദേശിൽ യോഗി ആദിത്യനാഥ് മന്ത്രിസഭയിലെ വനിതാ മന്ത്രി ബിയർ പാർലർ ഉദ്ഘാടനം ചെയ്തത് വിവാദത്തിൽ. യുപിയിലെ ബിജെപി മന്ത്രിസഭയുടെ നിലപാടുകളിലെ വൈരുധ്യമാണ് സംഭവത്തിലൂടെ വ്യക്തമാകുന്നതെന്ന് പ്രതിപക്ഷ പാർട്ടികൾ വിമർശനം ഉന്നയിച്ചതോടെയാണ് സംഭവം വിവാദമായത്

മെയ് 20 ന് കുടുംബക്ഷേമ മന്ത്രി സ്വാതി സിംഗാണ് ബിയർ പാർലർ ഉദ്ഘാടനം ചെയ്തത്. മന്ത്രി മുതിർന്ന ഐപിഎസ് ഉദ്യോഗസ്ഥർക്കൊപ്പം നിന്ന് പുതിയ ബിയർ പാര്‍ലര്‍ നാട മുറിച്ച് ഉദ്ഘാടനം ചെയ്യുന്ന ചിത്രങ്ങൾ സാമൂഹ്യ മാധ്യമങ്ങളിൽ പ്രചരിച്ചിരുന്നു. സംഭവം വിവാദമായതോടെ മുഖ്യമന്ത്രി സ്വാതി സിംഗിനോട് വിശദീകരണം തേടി.

മദ്യത്തിനെതിനെതിരായി യുപിയിൽ സ്ത്രീകൾ സമരം നടത്തുമ്പോഴാണ് വനിതാ മന്ത്രി ഇങ്ങനെ ചെയ്യുന്നതെന്ന് സമാജ്‌വാദി പാർട്ടി വക്താവ് രാജേന്ദ്ര ചൗധരി ആരോപിച്ചു. ബിഎസ്‌പി നേതാവ് മായാവതിക്കെതിരെ മോശം പരാമർശം നടത്തിയതിന് പാർട്ടിയിൽ നിന്ന് സസ്‌പെൻഡ് ചെയ്യപ്പെട്ട ദയാശങ്കർ സിംഗിന്‍റെ ഭാര്യയാണ് സ്വാതി സിംഗ്.

സംസ്ഥാനത്ത് മദ്യം നിരോധിച്ചിട്ടില്ലാത്തതിനാൽ മന്ത്രി ചെയ്‌തതിൽ തെറ്റില്ലെന്ന് ബിജെപി വക്താവ് രാകേഷ് ത്രിപാഠി പറഞ്ഞു. ഏത് സാഹചര്യത്തിലാണ് മന്ത്രി ഉദ്ഘാടന സമ്മേളനത്തിൽ പങ്കെടുത്തതെന്ന് അന്വേഷിക്കുമെന്നും ത്രിപാഠി വ്യക്തമാക്കി.

Row in UP over minister 'inaugurating' beer bar

UP minister inaugurates beer parlour, puts the BJP ministry into trouble. CM Yogi Adithyanath seeks for explanation.