ആധാറിനെതിരെ സംഘടിത ദുഷ്പ്രചാരണം: നന്ദൻ നിലേകനി

ന്യൂഡൽഹി: ആധാര്‍ പദ്ധതിയെ തകര്‍ക്കാൻ സംഘടിതമായ ദുഷ്‍‍പ്രചാരണമുണ്ടെന്ന് മുൻ യുഐഡിഎഐ ചെയര്‍മാൻ നന്ദൻ നിലേകനി. ബെംഗലുരുവിൽ നടന്ന പരിപാടിയിലായിരുന്നു നിലേകനിയുടെ പ്രതികരണം. പദ്ധതിയെ അപകീര‍്ത്തിപ്പെടുത്താനാണ് ശ്രമമെന്നും ആധാറിനെ തകര്‍ക്കാൻ സംഘടിതമായ ദുഷ്പ്രചാരണമുണ്ടെന്ന് നൂറുശതമാനവും വിശ്വസിക്കുന്നതായും അദ്ദേഹം പറഞ്ഞു. നിരവധി സുരക്ഷാസംവിധാനങ്ങളാൽ സംരക്ഷിച്ചിരിക്കുന്ന ആധാര്‍ വിവരങ്ങള്‍ സുരക്ഷിതമാണെന്നും അദ്ദേഹം കൂട്ടിച്ചേര്‍ത്തു.

119 കോടി ജനങ്ങള്‍ക്ക് ഇപ്പോള്‍ ആധാര്‍ കാര്‍ഡുണ്ട്. ആധാര്‍ ഒരു യാഥാര്‍ത്ഥ്യമാണെന്ന് എല്ലാവരും അംഗീകരിക്കണം. ഇതിൽ 5.5 കോടി ആളുകള്‍ ആധാര‍് നമ്പര്‍ ബാങ്ക് അക്കൗണ്ടുമായി ബന്ധിപ്പിച്ചിട്ടുണ്ടെന്നും ഡയറക്ട് ബെനഫിറ്റ് പദ്ധതി പ്രകാരം സര്‍ക്കാര്‍ ഇതുവരെ 95000 കോടി രൂപ അക്കൗണ്ടുകളിലേയ്ക്ക് ട്രാൻസ്ഫര്‍ ചെയ്തിട്ടുണ്ടെന്നും അദ്ദേഹം പറഞ്ഞു.

സ്വകാര്യത മൗലികാവകാശമാണെന്ന കേസിൽ നിന്ന് ആധാറിനെ സുപ്രീം കോടതി ഒഴിവാക്കുമെന്നാണ് പ്രതീക്ഷ. ആധാര്‍ വിവരങ്ങള്‍ കൈമാറുമ്പോള്‍ അധികസുരക്ഷയ്ക്കായി ഏര്‍പ്പെടുത്തിയ പുതിയ സംവിധാനത്തെ അദ്ദേഹം സ്വാഗതം ചെയ്തു.